Moduko bisan unsay isugo
Ambot unsa gyod ang tinagoan nilang Presidente Rodrigo Duterte ug Chinese President Xi Jinping, apan nabantang na sab karong bag-o unsa kaandam ang pamunoang Duterte sa pagkarakara sa pagtuman sa bisan unsay isugo sa kadagkoan sa gobyerno sa China.
Lahi sa ubang nanghimo og mga tambal, labi nang gagmay nga mga kompaniya, nga naabtan og siyam-siyam sa pagkuha og lisensiya gikan sa Food and Drug Administration (FDA), pila ra ka adlaw ang gikinahanglan sa China pag-angkon sa pagtugot sa pagpamaligya dinhi sa kontrobersiyal nilang tambal, ang Lianhua Qingwen Capsule (LQC).
* * *
Labihan kamaikugon sa FDA nga gitugotan ang Chinese Embassy sa pagpatuyang og pangangkon nga gitugotan na sa Pilipinas ang LQC isip tambal sa mild nga mga kaso sa COVID-19 ug pagpadayag sa kahinangop nga makatabang sa kampanya batok sa pandemya.
Naabtan ang FDA og pila ka adlaw una nakapatin-aw nga gitugotan nilang LQC isip tambal sa ubang mga sakit apan di sa COVID-19.
Gitambagan sa FDA ang local manufacturer sa paghunong sa ilang pangangkon nga makaayo ang LQC sa COVID-19. Wa hinuon mangahas ang FDA pagbaraw sa Chinese Embassy.
* * *
Nakabuylo nang propaganda sa Chinese Embassy una nakapasidaan ang FDA nga ang LQC mahimong mosangpot sa kidney stone formation, irregular heartbeat ug hypokalemia, pagtibugsok sa potassium, nga maoy hinungdan sa makamatay nga acute respiratory failure gikan sa muscle paralysis.
Maong giawhag sa FDA ang mga pasyente sa pagkonsulta sa ilang mga doktor, nga may katakos sa pagsusi sa ilang medical history ug sa posibleng seryuso nga mga komplikasyon, sa di pa motomar sa LQC.
* * *
Tungod sa pagtugot sa FDA, nisulbong dayon ang presyo sa LQC. Matag karton nga may 24 ka kapsula tag-P130 ra niadtong Abril.
Pagsusi nako sa online stores, nisulbong na ngadto sa tag-P359 matag karton gahapon sa hapon.
Nitumaw sang kabalaka nga tungod sa pagsulbong sa presyo motumaw ang mga pekeng LQC. Maong ang local manufacturer niawhag sa mga konsumidor pagbantay sa mosunod nga mga timaan: May flower mark ang karton sa mga peke, tanom ray dibuho sa tinuod; ug ang tinuod nga LQC may tukmang kasayuran unsaon pagtomar nga napatik sa karton ug managsama ang serial code sa karton ug inner packaging.
* * *
- Latest
