New normal sa mga durugista

Sa nasinating krisis gumikan sa coronavirus o COVID-19 pandemic, misakay usab ang mga illegalista sa pagpahigayon sa ilang mga transaksyon sama nalang sa mga nanginabuhi sa illegal drugs.

Niining bag-o lang sunodsunod ang kalamposan sa Philippine Drug Enforcement Agency PDEA Regional Office VII sa pakig-alayon sa kapolisan batok sa illegal drug trade.

Unang nasikop ang usa ka food delivery man nga nakuhaan og usa ka kilong shabu human nabisto sa mga otoridad ang iyang modus sa pagpahuyot og illegal nga drugas.

Ang naasoyng operasyon miresulta sa mas dako nga kalamposan diin nasakmit sa mga otoridad ang 12 kilos nga shabu nga nagkantidad og P81.6 milyones nga gipaagi sa courier service company.

Gisulod og tea bag ang kontrabando diin giayo sa pagputos og goma o interior sa ligid nga gipahiluna sa tulo ka mga equipment box.

Maayo nalang kay nasimhotan sa K-9 dog sa PDEA nga dunay drugas sa sulod sa kargamento ug dihang kompirmado ila dayong gipaubos sa proseso sama sa pag xray ug didto nakita ang kilong shabu.

Matod ni PDEA 7 Director Levi Ortiz nga adunay kalambigitan ang nahaunang operasyon nila sa ikaduha nga nabisto nila tungod sa gihatag nga kasayoran sa ilang dinakpan.

Dili ikalimod nga pagsugod sa pandemiya, ang tanan halos gipaagi na sa online ang pagpalit diin dinhi mas milambo ang online selling business aron malikay lagi sa virus. Apil pud seguro ang pamaagi sa mga durugista nga ilang gisabay sa uso ang delivery sa illegal drugs sa pamasin nga dili masakpan, ug kon masakpan man walay tawo nga madakpan.

Kini ang nahitabo karon diin nasakmit ang multimillion pesos nga shabu pero walay tawo nga nadakpan sa ikaduhang drug operation sa PDEA-7 operatives.

Dili sa pagkwestyon sa panginabuhi sa sama sa mga food delivery service kay lehitimo man kini ug mao usab kini ang gisaligan sa mga tawo karong panahona. Apan naduhigan kini sa ubang badlongon nga nakakita og oportunidad nga gamiton ang ingon niini nga pamaagi aron makalusot sa otoridad.

Samtang dili lang sa pagkaon kondili ang ubang mga delivery service kay mao naman gud ang nauso karon, basin nalutsan lang ang mga nagbantay sa pagtoo nga lehitimo ang ilang delivery pero front lang diay kadto.

Seguro kaniadto gihimo na apan mas naghitak kini karon kay nagtuo sila nga dili mabantayan, apan nasakpan na sa kadugayan ang ilang modus.

Matud sa opisyal sa PDEA-7 nga dakong sindikato ang naa sa likod niining illegal drugs nga mao usay gitrabaho karon sa mga law enforcement agencies. Apan kinsa man, bag-o ni silang grupoha ug karaan na nga nagpakahilom lang pero sekreto ra ang labok.

Dakong hagit sa mga otoridad kon unsaon nila sa pagpuhag kining mga nalambigit sa illegal drugs samtang mahimo pa nilang purilon kay basin og nakagamot na lisod na, mabali man ang sanga apan mosalingsing gihapon og mas molabong pa.