Dugang likay sa COVID-19

Kaniadtong Biyerness gisubhan nila ni Presidential Assistant for the Visayas Secretary Mike Dino, Cebu City Mayor Edgardo Labella, Cebu Governor Gwendolyn Garcia, Vicente Sotto Memorial Medical Center Chief Dr. Gerardo Aquino Jr., Department of Health Regional Director Jaime Bernadas, SM Prime Holdings Vice President and Special Assistant to the Chairman, Maria Eloisa Fernan ang bag-ong satellite dialysis center nga nahimutang sulod sa SM Seaside City Cebu nga alang sa mga renal nga pasyente.

Sa iyang mensahi atol sa pagsubo, gitug-an ni Secretary Mike Dino nga ang sentro gituyo alang niadtong mga renal nga pasyente nga mahadlok nang moadto sa tambalanan gumikan sa COVID-19. Pinaagi niini luwas ug komportable ang mga pasyente sa ila unyang pagpa-dialysis.

Gipasalamatan usab ni Dino si Teresita Sy-Coson, ang Vice Chairman sa SM Investment Corporation, sa pag-uyon sa hangyo sa gobyerno sa paghatag og lugar sulod sa ilang mall aron mabutangan sa dialysis center nga libre o way bayad.

Maingon nato nga aduna seguro mga pasyente nga malibre sa ilang bayranan tungod kay magamit man nila ang ilang PhilHealth. Kadtong dili maapil sa PhilHealth abagahon man sa Malasakit Center ug sa special fund nga gihatag ni Presidente Duterte ug Senador Bong Go.

Mintras tantong organisahon pa sa siyudad ug lalawigan sa Sugbo ang team nga maoy mopadagan sa sentro, ang Vicente Sotto Memorial Medical Center lang una ang temporaryong modumala niini.

Si Mayor Labella ug Governor Gwen Garcia nagkasabot nga ang tagsatagsa nila ka local government unit maoy mopaayo ug mo-mintenar sa hemodialysis machines kun ugaling kini maguba ug mobutang og mga personahe alang sa sentro.

Dako na kaayong tabang sa mga renal nga pasyente ang gisubhan nga dialysis center sulod sa SM Seaside City Cebu sa ilang paglikay sa COVID-19.

Dili ikalimod nga daghan na ang mahadlok nga mopaduol og tambalanan tungod kay kasagaran sa mga pasyente nga masulod sa tambalanan magpositibo man sa coronavirus. Busa haum ug tukma ang proyekto.