EDITORYAL - Di pa andam ang Cebu City

Dili pa gyud andam ang Cebu City aron paluagan pa gyud ang quarantine status niini hangtud nga dili masigurong kayang kontrolon sa mga barangay officials ang ilang mga konstituwente pagsunod sa minimum health standards.

Kinahanglan pa gyung lugwayan ang pagpaubos sa siyudad sa general community quarantine kay daghan pa gihapon sa mga molupyo nga padayong nagmagahi pagsuot og facemask, pagsunod sa social distancing, ug pagsige og gawas-gawas bisan di importante ang tuyo.

Gani duh aka adlaw gikan sa pagbiya sa PNP-SAF, dunay kapin 200 ka tawong nangadakpan ang kapolisan, sagad kanila, makadaghan nang nadakpan sa nangaging mga semana tungod sa quarantine violations. Makahadlok kining mga tawhana kay ang mga polis ug tanod ray gibantayan. Gihimo nilang kataw-anan ang mga otoridad.

Samtang mas daghan ang nagtuman sa gimando sa gobiyerno,  apan bisag usa o pipila ka lang ka mga gahi og ulo, mabutang ang tanan sa peligro ug kahasol.

Hangtud nga dili ni sila makatilaw og multa ug mapriso dili gyud kini sila mosanong sa health protocols.

Samot na gyud kun malibkas na tanan kining mga community quarantines, dili na gyud nila sila manumbaling sa minimum health standards, bisan para nalang unta sa ilang kaugalingon ug sa ilang pamilya.

Mismo si Mayor Edgardo Labella miangkon nga bisan tuod og gusto na niyang mapaluagan pa ang quarantine status sa siyudad aron mas daghan na ang makabalik sa panarbaho ug daghang negosyo ang makabalik sa operasyon, mas gustohon niyang mag GCQ lang gihapon. Pinaagi sa pagpabiling GCQ ang dakbayan, mas makontrol gyud ang gidaghanon sa mga tawong magawas-gawas sa kadalanan.

Mas may rason sab ang mga otoridad sa pagbadlong sa mga tawo ug labaw sa tanan, mas mapadali ang trabaho sa mga contact-tracers pagpangita sa mga tawong kataposang nakauban sa mga magpositibo sa COVID-19.

Dili unta balewalaon sa publiko ang peligrong dala sa COVID-19 kay sa tanang oras mahimo silang matakboyan niini kun dili sila mosunod sa mga health protocols.