Dialysis machines

Mga friends, dunay nagsulti nako nga karong Lunes pa mopahibawo si Presidente Duterte sa mga bag-ong quarantine category sa lainlaing dapit sa nasud, apil na ang Dakbayan sa Sugbo.

Apan karon pa lang daan nagtuo ko nga madeklarar gyud ang siyudad sa Sugbo ug ang silingan nga mga dakbayan sa Mandaue ug Lapu-Lapu, nga modified general community quarantine.

Kini tungod kay ang Department of Health (DOH) mipagawas og statistics nga sukad sa pagdeklarar sa Dakbayan sa Sugbo nga GCQ, ubos ra kanunay ang gidaghanon sa mga kaso sa coronavirus.

Buyno, malipay ko nga ma-MGCQ na ang siyudad sa Sugbo kay daghan na tawon ang nagping-it sa kalisud kay wa nay mga trabaho ug wa dugay ra nga nahurot ang ilang mga ginagmay’ng hinabang.

* * *

Kanunay gyud ko nga makadawat og reklamo nga dinhi sa Dakbayan sa Sugbo dunay mga kawani sa barangay nga wa kuno makadawat sa ilang City Hall honorarium. Ang uban kanila nagpakiluoy nga ako silang tabangan. Ako lang klaruhon nga dili kaayo ko makatabang ninyo kay ordinaryo ra tawon ko nga sakop sa media.

Dili man ko opisyal sa Cebu City Hall nga makahimo pagtabang. Ang mahimo nako, sama sa akong gihimo sa honorarium sa mga PWD, mao ang pag-awhag ra gyud ni Mayor Edgar Labella.

Pero kanang mga honorarium sa mga kawani sa barangay, nahibulong ko kay kami sa Barangay Apas, wa man mi makasugat og ingon niana nga problema.

Nagduda ko nga hinay’ng motrabaho ang kawani sa inyong mga barangay nga gitugyanan ninyo sa pag-follow up sa mga dukomento didto sa City Hall.

Buyno, kadtong dunay mga problema gyud, paninguha mo nga makontak ko ninyo kay ako kamong giyahan aron dili malangan ang inyong mga transaksyon kay hinay ra gyud tingali ang inyong tigpaloap.

* * *

Saludohan nato ang SM Prime Holdings Corporation kay matud ni Konsehal Eugenio Gabuya Jr. nga mihatag diay kini og napulo (10) ka Dialysis machines para sa dakbayan sa Sugbo.

Sugyot ni Gabuya nga maghimo og mga upat ka Diaysis Center sa siyudad para sa mga barangay sa urban south, urban north, rural south ug rural north.

Unya, si Secretary Mike Dino, miingon nga iya kining suportahan ug kon nindot ang epekto, magpahimo siya niini sa mga dapit sa probinsya sa Sugbo.

Dinhi sa dakbayan sigurado nga hapsay ang pagpatuman niini, ilabi na nga managhigala sila si Mayor Labella ug si Secretary Dino.

Natan-aw nako nga basta pagtagad sa kahimtang sa panglawas, tutokan gyud pag-ayo ni Dino, sama sa Malasakit Program ni Presidente Duterte nga siya gyud ang nagdumala.

Angay’ng pasalamatan nato si Dino kay daghan tawon kaayo ang mga nanginahanglan og dialysis.