GCQ di sa buhian

Ang 11 ngadto sa 20 kapin ka bag-ong biktima nga nataptag COVID-19 matag adlaw panahon sa general community quarantine (GCQ) Part 2, mubo na tuod kaayo kon ikomparar sa miaging unang GCQ, diin miabot sa tag-gatos kapin ang nangatakdan base sa inadlawng iniphanay.

Hinungdan, nga gipaubos ni Presidente Rodrigo R. Duterte ngadto sa Modified ECQ ang dakbayan sa Sugbo gikan Hulyo 16 hangtod Hulyo 31, kay nagsugwaksugwak na ang mga pasyenteng nalandig sa tanang tambalanan.

Nakita ni Duterte kining maong kahimtang. Gipadala niya si Department of Energy and Natural Resources Secretary Roy Cimatu, kinsa maoy iyang gitahasan nga maoy mangulo sa Inter Agency Task Force for the Management of Emerging Infectious Disease (IATF-IED) aron tabangan si Cebu City Mayor C. Labella sa pagpahinay sa nagakadaghang pagtinakdanay nga resulta sa kagahig ulo sa daghan kaayong badlongon.

Milampos si Cimatu. Miminus ang COVID-19 cases.

Busa, sugod Agosto 1 hangtod Agosto 15, gipaubos ang Cebu City balik sa naagian tang GCQ 1. Ania na ta sa GCQ 2, diin naobserbaran nga nagaka-us-os ang pagtinakdanay matag adlaw. Kon magpadayon ang pagminus, posibleng palugakan sab ni Duterte ang ihatag niyang kuwarentina dinhi sa ato ning umaabot Agosto 16.

Himoon na niyang MGCQ.

Sa MGCQ, magbaha na sa dalan ang daghang tawo ug sakyanan nga manggawas. Ang mga negosyong gisirad-an panahon sa GCQ, pangablihan na. Wala nay SAF nga hugtanong mopasunod sa balaod kay nanguli na sa kaulohan.

Dili kaha mahisama unya ang Cebu City sa gidangatan sa Manila, diin dihang gipaubos na kini sa MGCQ, miabot og linibo ang nangaigo sa COVID-19 kada adlaw ug misaka sab ang gidaghanon sa nangamatay?

Unta, GCQ dili usa buhian. Kinahanglang inaton ni’g 15 pa ka adlaw aron maobserbaran kon padayon ba ang pagkubos sa kaso.

Kay kining pag-ubos, ang resulta pa ni nga iyaha sa MECQ ug dili sa GCQ. Ang tinuoray nga inalisngaw sa GCQ, adto pa mamatud-an sugod sa Agosto 16 pataas.

Busa, nakauyon ko sa gipamahayag ni Mayor Labella nga gusto niyang ipabilin sa GCQ ang siyudad sa Sugbo kay mas makontrolar ang mga lihok sa katawhan. Ang pait, kay dili siya ang mopakanaog sa pinaleng hukom. Kaanugon!