SAF troopers negatibo sa COVID-19, giunsa nila?

Kong exposure na  seguro sa coronavirus o COVID-19 ang hisgotan, walay lalis nga maapil niini ang kapolisan, ilabi na ang mga sakop sa Special Action Force kon SAF nga gipadala og tuyo sa dakbayan sa Sugbo aron mapakgang ang pagkuyanap sa virus pinaagi sa ilang estriktong pagpatuman sa mga health protocols.

Adlaw gabii gisuhid nila ang mga dapit sa dakbayan sa Sugbo diin ilang nahinagbo ang tanang mga tawo sa mga barangay nga adunay daghang kaso sa COVID-19.

Sa usa ka buwan nilang serbisyo sa dakbayan sa Sugbo nilampos sila sa pagtabang sa pagpaubos sa kaso sa coronavirus.

Kini pinaagi sa disiplina sa katawhan nga malapason sa mga quarantine protocols kay bisan unsaon og hangyo sila dili man gyud madala pero niepekto ang ilang pamaagi.

Pag-abot nila dinhi sa syudad kaniadto kada adlaw dili mominus sa usa ka gatos ang ma-record nga kaso sa COVID-19.

Apan sa paglabay sa mga adlaw inanay nga nagkaubos nga miabot naman lang gani sa 11 ka kaso niadtong miaging adlaw.

Nagpasabot lang kini nga epektibo ang ilang mga pamaagi dili lang sa katawhan kondili apil mismo nila.

Hunahunaa lang sa 159 ka mga SAF troopers nga expose sa mga tawo walay ni usa kanila ang nataptan sa covid.

Giunsa man nila? Sayon ra ang tubag sa ilang labaw nga mao ang disiplina sa kaugalingon ug ang pagsunod sa mga health protocols.

Gaan ug sayon kuno matud sa SAF official nga himoon ang mga lakang paglikay sa virus.

Namatud-an na nila sa ilang mga ka tropa nga negatibo tanan base sa resulta sa ilang test sa wala pa sila gipapauli sa ilang mga naandan nga dapit diin mag-atubang na usab sa bag-ong misyon.

Kong nahimo kini sa elite force sa PNP nga nadestino sa syudad sa Sugbo walay rason nga dili sab nato mahimo ang paglikay sa kagaw.

Panapos nga pamahayag sa opisyal nga dili tinuod nga gahi og ulo ang mga Sugboanon kon dili kuwang lang og impormasyon sa mga angayang himoon.