PhilHealth dili na healthy

Ang Philippine Health Insurance Corporation (PhilHealth) ikatandi sa usa ka kahoy sa kinabuhi nga kuhaanan og hinabang sa katawhan oras nga ang miyembro maaberiya human bun-oga pag-ayo ang lawas sa pagpanrabaho, diin gumikan sa walay hunong-kayod, natakboyag sakit ug nalandig sa tambalanan.

Kabahin sa hinagoan sa mga mamumuo ang kuwartang misulod sa panudlanan sa gobiyerno, pinatud-ag luha ug singot, nga maoy gikuhaag binilyon ka pesos nga budget matag tuig aron itugyan ngadto sa PhilHealth ang obligasiyon sa paggamit niini sa hustong paagi alang sa miyembrong nanginahanglan.

Apan giampingan ba kini sa mga kadagkoan sa PhilHealth? Wala ba nila usik-usiki ang hinagoang salapi sa katawhan nga relihiyosong giandam aron adunay makuot panahon sa emerhensiya?

Makapakurat! Milanog ang makabungog kontrobersiya nga gipabuto ni Thorrsson Montes Keith, kinsa gianggaan og whistleblower sa mga senador human iyagyag ang grabeng kinawatayng gihimo sa mga top executives sa PhilHealth.

Matud niya, mikabat kunog P15 billion ang nakawkaw sa maong mga opisyal niini lang tuiga. Gitawag pa niyag Mafia ang estelo.

Sanglit, sa kadaghan sa hokus pokus nga transaksiyon, wala gyoy bisan usa sa mga kawani ang mipalag. Si Thorrsson, kanhi anti-fraud legal officer sa PhilHealth. Pero, miresayin na. Mga kauban ra niya sa trabaho ang top executives nga iyang gipasanginlang nangawat ug andam siyang mobarog paghikyad sa tanang kamatuoran nga iyang nahibaw-an.

Gipaimbestigahan na kinig maayo sa Senado. Labi na kay ang PhilHealth Acting Senior Vice President for Actuarial Services, Nerissa Santiago, walay lipodlipod mitug-an nga ang PhiHealth gamay na lang ang nahabiling kuwarta nga pundo. Padulong na sa pagkabangkrap.

Ug kon magpadayon pa kining dakong krisis sa COVID-19 pandemic, pagahikit-an ni Santiago nga basig mapareha sa traffic light ang dangatan sa PhilHealth, mosiga na ang pula. Timaan, nga sila mohunong ug manira na.

Unta, masubay unsa ka tinuod kining gipabutong anomaliya ni Thorrsson. Kon mamatud-ang tinuod, diin matumbok ang tanang tagsala, ipakanaog-hatag ang tukmang silot.

Unya imbargohon gayod ang tanang salapi ug bahanding mga kinawat aron ibalik ngadto sa panudlanan sa PhilHealth, nga ning tungora nahisama sa dakong kahoy nga gikuninitag ukit sa mga ulod ug anay, dili na healthy.

Makaluluoy! Mga dahon, sanga, nangalarag ug katumbahon na.