Nagtinga nga ekonomiya

Nag-una na ang Pilipinas sa mga nasud sa Southeast Asia nga dunay labing daghan nga kaso sa COVID-19. Basi sa talaan sa Department of Health kapin na sa 122 mil ang atong kaso niadtong Biyernes ug siguradong nadugangan pa ang maong gidaghanon karong adlawa.

Ang nagpadayong pagsulbong sa mga kaso hinungdan sa estriktong mga lagda sa gobyerno pagpugong sa pagkaylap sa sakit miresulta sa grabing pagkapiang sa atong ekonomiya.

Ang Philippine Statistics Authority mipahibawo na sa opisyal nga pagsulod sa atong ekonomiya sa gitawag og “recession.”

Ang recession mahitabo kun sulod sa duha ka sunod-sunod nga quarter sa tuig o unom ka buwan mohagsa ang Gross Domestic Product (GDP) sa usa ka nasud.

Ang GDP nagpasabot sa kinatibuk-ang kantidad sa mga produkto ug serbisyo sa nasud.

Sigun sa PSA mihagsa og 16.5 porsiento ang GDP sa nasud sulod sa milabay nga unom ka buwan.

Nagkahulogan ni og P680 bilyones nga kantidad sa nahanaw nga kita sa ekonomiya sa nasud tungod sa pagpanira sa mga kompaniya.

Ang recession gipaabot nang daan nga mahitabo sa atong nasud dihang gipatuman sa gobyerno ang lockdown.

Daghan sa mga kompaniya napugos sa pagpanirado ug daghan sa mga trabahante ang nawad-an og trabaho.

Way mahimo ang gobiyerno aron pugngan nga kini mahitabo tungod kay bisan ang mga adunahang nasud sa kalibotan apektado sa maong pandemiya. Apan posible unta nga atong nalikayan ang krisis kun nilihok pa og sayo ang atong gobyerno pagpugong nga makasulod dinhi sa nasud ang maong sakit.

Ang kadugay sa atong gobiyerno pagsira sa mga ganghaan alang sa mga langyaw, labi pa gikan sa China, maoy nakaingon sa dakong krisis nga atong giatubang karon.

Apan wala na tay mahimo niini, ang dakong hagit karon sa pamunoan sa nasud mao nga unsaon nga mahuman ang krisis sa labing daling panahon ug kun unsaon pagpabarog og balik sa nahagba ta’ng ekonomiya.

Ang pagbalik sa Metro Manila sa modified enhanced community quarantine status siguradong makalangan pa sa recovery sa atong ekonomiya.

Gikinahanglan sab ang klarong programa sa gobyerno unsaon pagluwas ang nagtinga ta nga ekonomiya.

Ang mga economic managers sa atong nasud gikinahanglang mopatuman og mga programa pagtabang sa mga negosyante nga naapektuhan.

Ambot og ang pagpasar sa Kongreso sa Bayanihan to Recover As One ug sa Corporate Recovery and Tax Incentives for Enterprises (CREATE) aron maayudahan ang mga kompaniya igo na ba nga makapalagsik og balik sa atong ekonomiya.