Ang hulagway sa Beirut

Daw apocalyptic ang nahitabo ang hulagway sa pantalan sa Beirut, Lebanon sa dihang nahitabo ang pag-ulbo niini dili pa lang dugay. Gitala nga dunay subra sa 100 ang nangamatay wala pay labot sa liboan ka mga tawo nga nasamdan gumikan sa maong pag-ulbo. Ambot lang kaha kun pipila ka mga Pilipino ang naapil sa maong trahedya.

Ginaingon pa nga nahitabo ang maong pag-ulbo sa luna diin nahimutang ang mga pabuto. Matud pa sab sa uban basin gyud kuno og kini gituyo gyud og bomba ug kon kiinsay angay basolon kana wala ta masayud pa sa kasamtangan.

Kalisang kini nga angayang pangandaman ug dili na maayong mokumpiyansa karong mga panahona kay ang hulga anaa sa kiliran sa matag usa kanato. Dili nato makita ang atong kaaway mahimong coronavirus o dili ba kaha kining hulga sa gubat nga magdala og kaalautan labina sa mga nasud nga makaluluoy ning panahon sa dakong kalisdanan.

Kining hitabo karon sa kalibotan nagpasabot ba sa katapusan sa kalibutan? Katalagman? Kagubot? Sakit? Kini ba kaha ang hinungdan kun nganong karong mga panahona imbis batonan sa matag usa nato ang paglaum nga human ning tanan mobanos ang kalinaw ug panaghiusa, nahimo naman hinuon kitang mga binilanggo sa kahadlok nga hilabihan?

Ug kun mapuno kita sa kahadlok nan, sinugdanan na ba kaha kini nga ang atong lihok ug panlantaw mahimong dumalahon na lang sa uban? Kinahanglang mag-ampo kita niini nga unta kita mapanalipdan sa nag-ung ong nga kadautan….

Dili lang kini mahitungod sa pag-ulbo gumikan sa bisan unsang pabuto o panghasing militar kondili mahitungod usab kini sa mga panghitabo mismo sa atong tagsa tagsa ka mga kaugalingon labina gyud ning panahon sa pandemiya. Kitang tanan vulnerable labina gyud sa mga tawo nga walay igong gisaligan kondili ang ilang kita diha sa ilang pagtrabaho nga nahimong nababagan gumikan sa pandemiya.

Miulbo ang mga kahingawa ug kun dili kita makapukan niini gumikan kay malisud alang kanato ang tanan, nan mamahimong katapusan na gyud nato tingali.

Dinhi lang gani sa ato, ang PHILHEALTH nipahimangno nga basin 2021 na lang gyud kutob ang pundo nga magamit sa pagtabang sa kadaghanan natong mga Pilipino.

Lisud kini nga pagpadayag kay ang maong pagpadayag maghatag man kanato og igong kabalaka kun unsaon na lang gyud nato ang tanan kun ugaling mahitabo gyud kini. Ginoo, Luwasa kami sa dautan!