EDITORYAL - Pildihonon sa pandemiya?

Sa padayong pagsaka sa kaso sa novel coronavirus disease bisan sa unom na ka bulang community quarantine nga hugot gipatuman sa gobiyerno gamit ang kapolisan ug kasundalohan, daghan ang nakapangutana kun asa padung kining sakripisyo sa katawhan.

Ang gobiyerno migamit sa tanang ahensiya niini lakip na ang sinundalong paghigpit batok sa mga tawo aron ipakita kun unsa ka seryoso ang hulga sa virus, daw wala man nagpakita ang maong pandemiya nga mohunong.

Niadto miaging semana, nalabwan na sa Pilipinas ang China sa tally sa kaso sa mga natakboyan sa maong sakit. Sa China gikan ang COVID-19. Tungod niini, daghan ang nangutana kun sakto ba ang mga lakang nga gihimo sa gobiyerno batok sa maong sakit. Nakita hinuon nga pinaagi sa higpit nga lockdowns mikubos gyud ang gidaghanaon sa mga natakboyan.

Apan sa pagbuhat niini, nikamang ang ekonomiya sa nasud, ug dunay mga report sa pag-abusar sa mga otoridad sa ilang pag-imponer sa lockdowns sa mga lugar nga dunay daghangkasso sa COviD-19.

Way laing pamaagi aron mabuntog kining maong salot kondili bakuna ra gyud. Apan kining bakuna, kun aduna man, dili dayon maabot sa Pilipinas, bisan pa sa pasalig ni Duterte.  Kini tungod kay daghan ang mga adunahang mga nasud nga nakauna na sa mganagpalistang mopalit niini.

Daan na sab mipahibalo ang World Health Organization nga maabtan pa og 18 ka buwan ang clinical trial sa madiskubrehang bakuna o mga bakuna ayha pa kini ipagamit sa tawo. Kun mao kini, maabtan pa og usa ug tunga ka tuig ayha pa kini mahibaw-an kun luwas kining gamiton sa tawo ug epektibo ba gyud batok sa COVID-19.

Kun mao kini ang senaryo, karon pa lamang mas maayong lilion sa gobiyerno ang sunod nga mahitabo. Dili mahimong magpabilin nalang kanunay ang mga tawo diha sa ilang mga panimalay hangtud sa hangtud.

Busa samtang wa pay kasigurohan bahin sa bakuna, pangandaman daan sa gobiyerno ang mosunod angay nga panagana.

Wala nagkadako ang sulod sa panudlanan sa nasud ug dako na kaayo ang utang sa kasamtangang administrasyon tungod ning pandemiya.