COVID-19 epicenter no more ang Cebu City

Kini ang gipadayag ni Secretary Roy Cimatu, COVID-19 Overseer sa Sugbo base sa iyang assessment human miubos kuno ang kaso sa contamination sa virus ug padayong pagsaka sa recovery rate.

Atol sa akong interview ni Cimatu miingon siya nga daw nabali na ang sitwasyon karon sa dakbayan sa Sugbo ug sa National Capitol Region diin miburot pagmaayo ang kaso sa COVID-19 karon nga maoy hinungdan nga gibalik sa Modified Enhanced Community Quarantine.

Gipadayag sa opisyal nga apil siya sa na lockdown sa Sugbo sukad siya gitahasan sa paghimo og mga lakang aron mapugngan ang pagkatap sa virus nga mitakboy sa daghang mga tawo.

Gani tungod sa kadaghang mga kaso sa COVID-19 si Cimatu mismo ang mibansag sa Cebu City nga COVID-19 epicenter apan mipatuman sila og mga estratihiya aron ma-contain ang virus contagion ug hinay hinay na kining nagbunga.

Kaniadto kada adlaw dili moubos sa usa ka gatos kada adlaw ang matala nga covid positive sa dakbayan apan inanay na kining miubos nga miabot nalang sa kapin 20 ka mga kaso.

Tungod niining maayong kalamboan malaumon si Cimatu nga makalampos sa GCQ human sa 15 ka adlaw ug mahimo na nga MGCQ ang dakbayan sa Sugbo, apan posibleng kaha kini nga hilabihan pa man ka mga supakiro ang mga tawo sa gipatuman nga protocol?

Ang tubag niya ug ni Mayor Labella nga ang kooperasyon sa katawhan ang maghatag niini og katumanan aron dili na modaghan og balik ang kaso sa covid sa Cebu City.

Sukad gipatuman ang GCQ midaghan usab ang mga nadakpan nga mga violators nga mo-average kuno og 250 kada adlaw, gani sa unang adlaw pa lang 500 kapin ang nangadakpan.

Pastilan kon dili gyud mopatuo ang mga tawo inay ma-GCQ na human sa Agusto 15, basin mabalik na pud sa ECQ o MECQ ug dili na intawon makasugakod seguro ang kagamhanan sa pagsuporta sa panginahanglan sa katawhan, wala naman gani karon labaw pa kon mabalik sa mas taas nga quarantine status.

Hinaut unta nga mabarugan kini ang paghulagway ni Cimatu nga COVID-19 epicenter no more ang dakbayan sa Sugbo.