Gahi og ulo, humok og tiyan

Nagpabilin nga estrikto ang pagpatuman sa health protocol bisan og gipaubos na ngadto sa general community quarantine ang dakbayan sa Sugbo.

Gani nagpabilin pa man ang mga border control ug mga checkpoints sa nagkadaiyang dapit sa siyudad.

Daghan gihapon ang nangadakpan tungod sa mga violation nga nahimo sama sa wala pagdala og mga quarantine pass o kaha kon naay quarantine pass pero wala matunong ang iyang schedule sa pag gawas maong nadakpan.

Seguro moingon ang uban nga mga gahi og ulo kining mga tawhana nga milapas gyud sa lagda pero kon paminawon seguro nato ang ilang rason masayran nato nga gikinahanglan gyud pud nila nga mogawas aron sila maka-survive.

Nasayod na silang daan sa ilang dangatan pero wala silay kapilian kay importante man sad kaayo ang ilang katuyoan sa gawas.

Tinuod nga gikinahanglan nga mosunod gyud sa protocol kay para kini sa kaayohan sa tanan. Pero unsaon naman lang kon gikinahanglan nila mopalit og pagkaon, ipadaplin lang una kini ug dili nalang mokaon aron dili madakpan.

Maayo kaayo ang uban mohukom nga moingon dayon og mga gahi og ulo pero wala sila masayod sa tinood nga hinungdan.

Nigahi ang ilang ulo tungod kay nihumok namam ang iyang tiyan sa kagutom maong nagmarka bahala sila aron dunay ikapaslak sa ilang tiyan.

Kinsa man gud tawon ang gustong madakpan, wala gyud pero unsaon man nga gikinahanglan na gyud sa kahigayonan.

Maayo unta kon naay insaktong suporta ang kagamhanan ngadto kanila kay bisan usa ka tuig seguro dili mogawas sa ilang mga pinuy-anan.

Bitaw bisan unsa man nga excuse ang himoon sa mga tawo pag-justify sa ilang violation dili gyud kana mosaler kay naa man gyud ang lagda nga gikinahanglan sundon.

Kini dili angayan balihon ug gikinahanglan nga sundon aron mahuman na kining atong kalbaryo karon.

Gamayng sakripisyo lang alang sa malungtaron nga kahupayan sa atong kahimtang.

Sa tinuod lang ang otoridad gikapoy na sad na sa pagbantay ug pagbadlong sa mga tawo kay sila mismo delikado nga mataptan sa virus gikan sa mga tawo.

Magsinabtanay nalang kita ug unahon nato ang pagsunod sa gipatuman nga health protocols aron dili na mobalik sa mas hugot nga quarantine status.