Diskarte ug kakugi

Karong adlawa ang State of the Nation Address SONA ni Presidente Rodrigo Duterte diin gikatakdang iyagyag niini ang mga nahimo sa kagamhanan ug ang mga himoon pa ubos sa iyang pamunoan.

Unsa naman kaha ang estado karon sa atong nasud? Atangan nato sa mga ipamatbat sa pangulo nga gipanglantawan nga moani gyud og managlahing reaksyon.

Ang Covid-19 pandemic ang pinakadako nga hagit ug pagsuway nga nasinati karon sa nasod ug padayon kini nga mianay sa atong ekonomiya nga kasamtangang nagpinal na tungod kay apektado man tanan nga katawhan.

Walay gipili maadunahan o mapobre man, mayanong lungsoranon o mga opisyal sa kagamhanan naigo aning kagaw karon.

Naghatag man kini og dakong kabalaka ug kahadlok sa mga tawo apan dili angay nga magpaanod kita sa sulog sa kalisang sa Covid-19 kay dili lang ang panglawas kon dili ang atong kaugmaon ang malukapa kon dili kita mosungasong alang sa atong kaluwasan.

Dili ikahibulong nga adunay makasaway sa pag-handle sa gobiyerno sa nasinating pandemiya pero nakita ba usab nila ang ilang kaugalingon kon unsay ilang nahimo pagtabang nga makalingkawas og sayo gikan sa pagkaulipon sa kahadlok sa Covid-19.

Ang gobiyerno igo lang mopatuman sa mga gikinahanglan nga lagda nga subayon sa mga tawo pero anaa gihapoy mga gahig ulo nga kinahanglan pa nga gamitan og pwersa aron motuo.

Samtang kadaghanan moingon nga kuwang o walay ayuda gikan sa gobierno, tinuod gyud pero dili seguro angayan nga isalig nalang ang tanan ngadto sa kagamhanan.

Diskarte karon ang gikinahanglan sama sa mga tawo nga naninda og ginagmay sa mga daplin sa karsada.

Nangguho karon nga murag uhong kining mga gagmayng negosyante aron mokita alang sa pagbuhi sa pamilya.

Nganong nahimo man ni nila nganong dili man sa uban? Makaingon ko nga dili nato isalig ang tanan sa kagamhanan inay gamiton nato ang kakugi ug diskarte aron makasugakod kita sa dakong hagit karon.

Walay laing mabasol sa kalisod karon kon dili mao ra gyud ang kagaw nga dili makita diin gustohon man nato og sa dili mahimong kabahin na kini karon sa gitawag nga new normal busa padayon kita sa atong kinabuhi inubanan sa hugot nga pag-ampo sa Ginoo makaya ra nato kining malingkawasan.