Pangangin o kawad-on?

Usa’g-usa nato dili perpekto. Aduna gyoy kakulangan ug kaugalingong limitasyon. Hinungdan, nga hangtod karon, ingon sa ako gihapong madunggan kadtong pirme namong kantahon sa among high school room, ang “No man is an island. No man can stand alone.”

Ang leksiyong mapupo gikan sa maong sambingay, nagtumbok nga ikaw ug ako, kinsa nagpuyo ning kalibotan, dili mabuhi nga mag-inusara. Gikinahanglan gyod ang pagtinabangay aron ang bug-at mogaan. Ug ang lisod mahimong sayon.

Panultihon nga aplikable kaayong buhaton ning panahon sa kalisod, diin giatubang sa katawhan ang kulba-hinam nga matang sa kamatayon. Ug nagkahiusa ba tanan sama sa nagpanon nga hulmigas, ang pagtinambayayongayg alsa ning bug-at nga alsahonon?

Ang daghang nangadakpan tungod kay wala magsul-ob og facemask ug nanggawas sa ilang balay nga walay dalang quarantine pass, pipila lamang kini ka kamatuoran, nga ubay-ubay sa atong kaigsoonan ang walay kasingkasing mopaambit bisan sa ilang tudlo na lang unta aron motabang pagpagaan ning dakong krisis nga gipas-an sa atong kagamhanan.

Sagad kanila maoy gihimong rason ang kawad-on. Nga tungod kuno ilang pamilya wala nay kan-on, napugos paggawas sa ilang balay aron mangita sa dalan og kakhaonon nga ikapakaon sa gigutom nilang mga minahal.

Apan subo palandungon, nga pipila sab kanila, dihang giablihan na ilang lugar nga gi-lockdown, mora silag mga kabayong mola nga nakabuhi sa kuwadra, nagpiyesta! Mga tawo nagtapok. Mga bata nanagdula. Ug nagpasabong sa ilang hiniktan ang mga sabongero, kinsa pulos wala magsul-ob og facemask.

Niadtong Hulyo 18, 2020, adunay nagtinigbakay sa Barangay Tominjao, Bantayan, Cebu. Duha ang nadakpan, puro pa senior citizens, kinsa parehong beneficiary sa Social Amelioration Program (SAP). Pastilan, abi nakog ang tagaag SAP kadto rang nagkalisodlisod. Hasta sab diay ang mga nagpapobrepobreng sugarol?

Makaduda. Hibawo na baya ang mga kabos nga naay COVID-19, diin importante ang pagsunod sa mga balaod sa kuwarantina. Pero nganong mahigugmaon man gyod silang mokontra niini? Wala kaha kini nila tuyoa aron tanan, ma-dato man o ma-pobre usa ray puntariyahan: kondili tambalanan, lubnganan?

Unsa ba ang tinuorayng hinungdan ning ilang pagpabadlong? Kawad-on gyod kaha, o gusto lang silang mangangin? Unta, mahatagan kinig seryosong aksiyon sa atong mga magbabalaod. Aksiyon nga makapatagam. Ug dili aksiyon nga makapahigalam