EDITORYAL - Face-to-face classes angay pangandaman

Duna gyud gihapoy face-to-face nga klase nga mahitabo sa mga tinun-an apan limitado lang kini ug mag-agad sa sitwasyon sa lugar ug rekomendasyon gikan sa Inter-Agency Task Force on COVID-19.

Gipirmahan ni Pres. Duterte ang pagpahigayon og limi¬tadong face-to-face classes sa mga pinili nga lugar nga gikonsiderar nga low risk areas.

Si Education Secretary Leonor Brio¬nes mismo ang mipresentar niini kang Duterte. Hinuon dili tanang eskuylahan sa nasud ang tugotan nga makahimo niini.

Matud pa usa o duha lang ka adlaw mahimong mag face-to-face ang magtutudlo ug mga tinun-an ug magsugod kini sa Enero 2021 pa o ikatulong kwarter sa school year ug limitahan sab ang gidaghanon sa mga tinun-an.  Ang pagusab sa sistema sa pagtudlo dinhi sa Pilipinas bag-o pa para sa uban ilabi na sa mga pangpublikong mga tunghaan.

Dili tanang mga tinun-an ang dunay access sa kompyuter o gadget mao nga si Briones miingon nga mahimo ipaagi kini sa modular learning o mga basahon, pagpaminaw sa radio ug telebisyon.

Apan angay sab hunahunaon nga ang edukasyon sa mga bata dili lang mahitungod sa mga Englis, Math, Sciences ug uban pa.

Kinahanglan nilang makat-onan kun unsaon pakiguban sa uban uug mamahimong responsableng molupyo sa nasud pinaagi sa pagkat-on og maayong pamatasan, disiplina, pagpailob ug pagpasaylo.

Tungod kay sa Enero paman kini mahitabo, mas maayong gamiton sa DepEd ang panahon samtang nag-online ug modular schooling pa ang mga bata , paghimo og mga control measures sa mga lawak-saringan.

Sama sa pagbutang og mga barriers sa mga bangko, pagpaayo sa mga gripo sa tubig aron kanunay nga makapanghugasang mga bata ug uban pa.

Angay sab pangandaman kining pagsugwak unya sa dugang mga estudyante gikan sa mga pribadong mga tunghaan nga namalhin tungod gihapon sa epekto pandemiya sa pinansiyal sa mga ginikanan.

Sama sa ginaingon sa kadaghanan, ang Banat News nagtuo nga kinahanglan magpadayon sa pagkabuhi ang mga Pilipino ilabi na ang kabataan bisan pa man sa pandemiya. Kinahanglang dili sila mahikawan kun unsa ang angay nilang makat-onan isip sumusunod nga magdala sa nasud.