Mga bantay-pasyente sa Sotto gihinganlan

Doble kalbaryo karon ang gipas-ang kabug-at sa mga nagbantay og pasyente sa Vicente Sotto Memorial Medical Center human sila gihinginlan sa tagdumala sa nahisgotang tambalanan tungod kay matud pa wala na masunod ang social distancing sulod sa tambalanan.

Tungod niini nagtapok sa gawas sa gate sa Vicente Sotto ang mga bantay-pasyente nga nauwananan ug nainitan gumikan kay walay gikapasilongan dihang mibusdak ang kusog nga ulan nianang pagkagabii ug miinit nianang pagkaadlawan.

Kining maong sitwasyon gipaabot kanako sa bantay sa usa ka pasyente sa Vicente Sotto nga taga Bohol. Siya nagpakitabang tungod sa kalisod sa ilang kahimtang ilabi na sa ilang personal comfort. Ang reklamo sa taga Bohol dakong tinuod human migawas sa Balitang Bisdak niadtong Lunes sa hapon ang reklamo sa daghang mga bantay-pasyente sa Vicente Sotto kinsa mipagawas gihapon sa susama ra nga sentimento sa ilang kahimtang nga gihinginlan sa mga tagdumala sa nahisgotang tambalanan.

Ang mga bantay-pasyente andam nga mosanong sa bisan unsa man nga ipatumang health protocol sama sa social distancing ug paglimit sa ilang gidaghanon sulod sa tambalanan dili lang sila mapalayo sa ilang pasyente ug dili lang pod sila hinginlan sa gawas sa tambalanan.

Ako lang pahinumduman si Dr. Gerardo Aquino, ang administrador sa Vicente Sotto Memorial Medical Center, nga ang nahisgotang tambalanan dili pribado kun dili usa kini ka pampublikong tambalanan.

Kun ang inyong cocerned mao lang ang social distancing nga mao unya ang mamahimong hinungdan nga modaghan ang COVID-19 sa sulod sa tambalanan, ang paghingilin na lang ba gyod sa mga bantay-pasyente ang labing sayon ninyong solusyon?

Angayan nga hinumduman sa mga nagpadagan sa Vicente Sotto nga ang mga pasyente nga anaa niining maong tambalanan mga taga lagyong lugar busa ipakita unta ninyo sa mga nagbantay niining maong mga pasyente ang bisan gamay nalang ninyong kompasyon sa ilang kahimtang.