“Napalaw” ang katawhan

Dili na manghatag og dugang ayuda ang dakbayan sa Sugbo ngadto sa katawhan kay alang kang Mayor Edgardo Labella igo na ang nahatag nga ayuda sa kagamhanan sa nangagi.  Sa pagpa-ubos sa dakbayan ngadto sa MECQ, adunay nadawat nga tag-usa ka milyon ka pesos ang matag barangay. Sa tawo nga mapasalamaton, igo na ang tabang sa kagamhanan; apan sa tawo nga mapahimuslanon ug wala’y katagbawan, wala’y ayuda nga paigo sa panginahanglan.  Adunay gihingalan sa tawo nga nagdahum apan wala makadawat: “NAPALAW”. Hala no!

Diskarte sa kura

Tungod kay gidili pa man ang pagtapok-tapok karong panahon sa pandemya, adunay pipila ka simbahan sa Quezon City nga mipahigayon og santos nga misa ibabaw sa Pick Up truck inay sa sulod sa simbahan.  Gihinganlan ang maong kalihukan nga “Truck ni Kura” nga matud pa sa tigpasiugda, maoy tubag sa “pagkauhaw ug pagkagutom sa katawhan sa eukaristiya”.  Tungod sa pandemya, dili lang pagkaon sa restaurant ang adunay “combo promo”, lakip na usab diay ang relihiyosong kalihukan. Diskarte pa more!

Masugba ang badlongon

Namulong ang taga-DOH nga kon buot kita nga molampus sa atong pagpakigbatok sa COVID-19, kinahanglan nga usbon na ang naandan’g kinaiya sa katawhan ug ipahaom na kini sa bag-ong normal. Dakong hagit ang gipadayag sa DOH kon basehan ang kinaiya nga gipakita sa katawhan.  Matud pa bitaw sa atong mga katigulangan, “Maliso pa’y buko sa kawayan”.  Aw, kon magmagAhi gyud sa ulo, segurado masugba sa kalayo. Cremate na this!

‘Overworked but underpaid’

Mipadayag na ang kahugpungan sa Filipino Nurses United (FNU) sa ilang kasagmuyo sa ilang kahimtang nga gihulagway nga “overworked and underpaid”, lakip na ang giingon’g kalangay sa gobyerno pa-tubag sa ilang yangungo mahitungod sa ilang malisod ug kuyaw nga kahimtang.  Angayan nga paminawon ug atimanon na sila sa kagamhanan.  Ang pagpasagad sa ilang kahimtang mao unya’y mahimong mitsa sa atong kaalautan.  Kay ginaingon baya nga “ang labing dakong hulga sa atong kaugmaon mao ang way pagpakabana”.  Palihug atimana!

Luna alang sa mitaliwan

Miuyon na ang mga lumolupyo sa Barangay Sapangdaku sa giproponer nga publikong sementeryo nga tukoron sa ilang lugar.  Nasuta kini human sa gipahigayon nga public hearing uban sa mga opisyales sa dakbayan sa Sugbo ug sa DENR.  Nahibaw-an nga sagad sa kabukiran sa dakbayan ubos na sa Protected Area. Adunay rason ug puno sa kinaadman ang pagtukod sa atong mga katigulangan og sementeryo sa kapatagan daplin gani sa kabaybayonan. Kakulang sa luna ang hinungdan ngano nga wala tamda ang maong sumbanan.  Gihurot na og okupar sa mga buhi ang luna sa kapatagan mao nga ang mga minatay adto na ipahiluna sa kabukiran.  Baya no!