EDITORYAL - Dakong hagit sa contact-tracers

Maayong palig-unon ug seryusohon sa gobiyerno ang contact-tracing sa mga tawong kataposang nakauban sa mga nagpositibo sa novel coronavirus disease ug nagkinahanglan kini og kooperasyon gikan sa katawhan.

Ang contact tracing abagan na sa kapolisan tungod kay sila adunay kapabilidad mangita sa mga tawong posibleng nataptan na sa virus. Mabuhat lang kini pinaagi sa house-to-house tracing nga gitawag og Oplan Kalinga.

Apan miani sab kini og mga pagsaway kay nabalaka ang mga tawo nga basin parehason ang pagtratar sa mga tawong gipangita sa kontrobersiyal nga Oplan Tokhang sa PNP.

Gipasalig hinuon sa Department of Interior and Local Government (DILG) nga dili parehas sa Tokhang ang Oplan Kalinga. Ang tumong sa karon mao ang pagpangita, pagbuwag ug pagtambal sa mga natakboyan.

Apan dakong pangutana karon kun dili ba kaha ni programang walay kahumanan kay lugak naman ang quarantine unya magkadaghan gihapon ang mga matakboyan kay manggawas naman balik ang mga tawo.

Mas epektibo ang Oplan Kalinga kun ang tanang lugar ubos pa sa ECQ tungod kay sayon ra kaayo pangitaon ang mga tawo. Bisan gani ang Police Regional Office-7 miangkon nga kun lugakan ang quarantine maglisod gyud sila pagpangita sa mga tawo.

Bugtong ang Cebu City nalang ang higpit pa tungod kay ubos pa kini sa modified enhanced community quarantine.

Unsaon naman lang pagpangita sa mga contact-tracers sa mga kataposang nakauban sa positibo sa COVID-19 kun kining mga tawhana nanglarga na o ba kaha namalik na sa trabaho ug uban pa kay luag na ang pagbantay?

Ang maayong buhaton, kun nagduda mo nga may posibilidad nga na-expose kamo sa positibo sa virus, mas maayong magpundo nalang sa balay ug tawgan ang mga otoridad aron di na makatakod sa uban.

Kinahanglan sab nga diniyoson sa mga barangay officials ang pagpatuman sa stay home policy, health protocols sa ilang mga konstituwente bisan og MECQ o GCQ na. Pagkakaron, wa pay rason aron ibalik sa ECQ ang tanan, apan mahitabo gyud kini kun di gihapon motuman sa mga health protocols ang mga tawo.