Saan na sila ilalagay?
Tatlong malalaking ospital ang nagpahayag na puno na ang kapasidad nila para sa mga COVID-19 na pasyente. Ang Makati Medical Center, St. Lukes Medical Center at National Kidney and Transplant Institute ang halos sabay-sabay nagpahayag. Hindi na sila makatatanggap ng mga pasyenteng positibo para sa COVID-19 na kailangang ma-ospital o mga malalang kaso. Hindi naman ibig sabihin na puno na ang ospital kundi ang inilaan nilang mga kama para sa COVID ay puno na dahil hindi naman puwedeng ipagsama sa mga pasyenteng may ibang kalubhaan.
Ang bilang ng mga positibong kaso ay 57,545 habang isinusulat ito. Napakalaki na ng idinagdag mula nang sumailalim sa GCQ ang Metro Manila at ibang lugar. Nagpahayag na nga ang Palasyo na mukhang itutuloy pa rin sa GCQ ang Metro Manila at hindi pa puwedeng buksan lahat. Wala namang balita kung ibabalik sa MECQ o sa ECQ.
Sa tingin ko, malakas na rin ang boses ng mga negosyante. Ang Navotas ay ilalagay sa lockdown mula Hulyo 16-29 dahil sa dami ng positibong kaso.
Ang mga nakakausap ko ngang doktor ay pare-pareho ang sinasabi. Epektibo ang lockdown. Noong Abril at Mayo ay pababa na ang araw-araw na bilang ng mga kaso. Halos naging regular na ang patakbo ng mga ospital.
Pero magmula Hunyo, bumalik ang kaguluhan sa rami ng mga pasyente. Ang linya para sa testing ay napakahaba. Totoo na maraming kaso ay mga asymptomatic o mga walang sintomas at kailangan lang magpahinga sa bahay at hindi lumabas ng dalawang linggo. Pero sa dami ng mga kaso ay tiyak may mga lalabas na malubha. Kung puno na ang mga ospital, saan na sila ilalagay?
Kailangang makibahagi ang lahat para labanan ang pandemyang ito. Iwasan na muna ang pamamasyal kahit bukas na ang mga mall. Lumabas lang kapag talagang kinakailangan.
Alam ko marami riyan ang kailangang lumabas para magtrabaho o buksan ang mga negosyo. Sana ay laging magsuot ng mask at manatili ang physical distancing. Kailangang pigilin ang pagkalat kung hindi masasapawan tayo nang husto
- Latest
