Sinugdanan sa tanang bulilyaso
Ang mga barangay kapitan maoy nagkapuliki og pamalibad sa mga molupyo sa Dakbayan sa Sugbo nga wa mahatagi og quarantine pass ug naglisod pagsabot nganong maghuwamay sila og pases nga ang City Hall maoy responsable sa kalangay ug kahanap sa mga lagda sa kalit nga pagkanselar sa karaan ug nalangay nga pagpagawas sa bag-ong mga pases.
Ug sakto sila. Apan samtang si Mayor Edgar Labella maoy responsable sa kayagaw sa pases puno sa nangagi niyang mga bulilyaso, di siya mao ray matulisok sa kapakyas pagbadlong sa pagsulbong sa mga kaso sa COVID-19.
* * *
Kay ang kakuwang sa testing sa dakbayan, labaw sa gipasangil nga ka way disiplina sa mga Sugbuanon, maoy tinuod nga hinungdan nganong bisan human sa taas nga lockdown nagpadayon ang paspas ug lapad nga tinakdanay sa kabaranggayan.
Ang kakuwang sa PCR test kits, reagents, mga laboratoryo ug health workers di hingpit nga ikahan-ok nilang Labella ug sa ubang lokal nga mga opisyal. Pabiling napakyas ang Department of Health (DOH) ug ubang mga buhatan sa nasudnong gobyerno sa paghatag sa labing batakan nga mga panginahanglan sa kampanya batok sa kalibotanong pandemiya.
* * *
Hinaot nga gawas sa pagpakatap sa dugang mga polis ug mga sundawo ug mga tangkeng iggugubat, nagda sab silang Health Secretary Francisco Duque ug ang naglibot niyang retiradong mga heneral sa dinaliang sulbad sa kakuwang sa COVID-19 tests, kanang PCR di ang way kapuslanan nga rapid testing.
Kay kon way testing, magpabiling buta ang dakbayan pagpangita sa mga molupyo nga nataptan hangtod nga makapanakod sa mas daghan ug mograbe nang kahimtang nga mas mabahaan pang mga tambalanan.
* * *
Nahibawo tang tanan kinsay nakababag sa nasudnong gobyerno sa paglusad og matinud-anon nga kampanya batok sa COVID-19. Siya ang nagbuot sa pagpatuman sa tanang sayop nga mga lagda nga nakapasamot inay makapugong sa tinakdanay.
Siya ang naglangay-langay pag-ban sa flights gikan sa China tungod sa kabalaka nga masilo ang kabubut-on ni Presidente Xi Jinping. Siya ang nitugyan sa kampanya ngadto sa mga heneral inay sa mga espesyalista ug mga eksperto sa public health. Siya ang namugos sa pagpanghudlat sa mga molupyo inay pagpangita kinsay mga masakiton aron mabuwag ug matambalan sa labing daling panahon.
* * *
- Latest
