Asa ang Simbahan?

HULYO 5, 2020:  Ikanapulog-upat nga Domingo

sulod sa tuig

Mga Pagbasa: Zac. 9;9-10/Sal. 145/Rom. 8;9,11-13/Mt. 11;25-30

Kini ang usa sa mga panahom sa usa ka magsusulat diin iyang gipahimug-atan ang kaakohan sa simbahan ingon nga institusyon ning panahon sa pandemiya ug unsay gihimo sa simbahan ingon nga institusyon labina sa pagtabang sa mga sakop niini nga anaa sa kalisdanan.

Kun kadto ang iyang pangutana, ambot kun sama sa mga yanong tawo mangutana: “Hain kaha ang Dios ning panahon sa Pandemiya?” Kay kun gamhanan ang Dios nganong wala pa man gyud niya mapahunong ang COVID ug nganong mibuot man siya nga padayong mag-antos ug mangamatay ang daghang mga tawo labina kadtong mga inosente?

Wa pay labot niini ang pangutana kun nganong dunay mga “ulipon” kuno ni Haring Lungsod nga mas nipalabi sa mga langyaw kay kanatong mga Pilipinhon ning panahon sa dakong kalisdanan? Asa man ang Dios? Nakatulog ba?

Sama sa ubang institusyon ang simbahan ingon nga organisadong hugpong dili hingpit. Kun maghisgot kita og dili hingpit nagpasabot kini nga sama sa uban duna sab siya’y kakuwangan. Bisan pa man ning maong kakuwangan naningkamot siya nga mohimo kutob sa makaya sa pagpagaan gaan sa gipas-ang suliran sa iyang mga anak.

Ang sipyat ug salawayong buhat sa ubang sakop sa hirarkiya kaniadto pa man na maingon nga ang mga dili angayang mohupot sa pangatungdanang publiko ang nakahupot gihapon gumikan kay nahimong mas daghan ang mibuot nga boto nila paliton kaysa moboto og tinarong ug pinasikad sa lohika ug konsensiya. Kay bisan kinsa pa tingali ang mangulo kun ang mga sakop niini walay igong tinguha nga mosakripisyo mamahimong kawang lamang ang siyaok sa mga raliyista diha sa kadalanan.

Sa atong ebanghelyo karon ang atong Ginoo nihatag og pasalig nga si bisan kinsang gikapuyan ug gibug-atan sa gipas-an ang moduol kaniya aron magaan gaanan ug mahupay. Sa laktod ning panahon sa pandemiya matag usa kanato taliwala sa atong kahimtang ang nagkinahanglan og dakong panginahanglan sa kahupayan.

Bug-at alang kanato ang tanan. Daw sa malisud alang kanato ang panahon karon. Tanan nato aborido samot natong mga mga igsuon nato kang kansang panudlan ug panabot nahimong uhaw sa bisan unsang matuod ug husto.  Gisud-ong nako ang krusipiho nga gipanag-iya ni Padre Norberto Llanos.

Itom na kini tungod sa gidugayon niini ug sa akong pagsud-ong niini nahinumdom ko mismo sa tag-iya niini nga si Padre Norbing.

Ang iyang assistant kanhi nga ako pud nga Kura kaniadto nga si Anhing Padre Elmer Colina nisugilon nga si Padre Norbing niangkon sa iyang dakong kasagmuyo diha sa iyang pag-ingon: “Maayo pa ning batan-ong pari pa ta Elmer kay humot ta sa atong kadagkoan apan kun kita tigulang na, aw isalindot na lang kita sa daplin!” Tingali si Padre Norbing nakapangutana pud: “Asa man ang Simbahan ning akong katigulangon?”

Nahapugwat ko sa akong pagpamalandong sa dihang dunay niduol nako kay mangayo og bugas. Maayo na lang gani kay dunay nahabilin pa sa mga bugas nga among gipang apod apod panahon sa COVID-19.

Kun wa ko masayop mga 3 waves tingali ang nahimo sa Parokya ni San Jose sa Madridejos, Alegria. Tag duha ra tuod among nahatag kay limitado raman ang tinubdan apan lipay ang mga simbahan.

Kini tungod kay bugas nabayloan pud og mga utanon. Ang simbahan dili lang organisadong pundok sa kaobispohan ug kaparian kondili usa kini malukpanong hugpong sa katawhan sa Dios nga nahimong ulusahon gumikan sa paghigugma. Dunay nangutana nako: “Pads di jud ka maibog og babaye?” ako siyang gitubag og: “Dili lang ko mosulti og panapos kay armasan raba ko!” bugtong bahakhak lang among gibuhiang kagahob ning panahon diin ang kamingaw ug kalaay maoy nihar.