Pahumokon ang mga gahi’g ulo

Naay diay humok nga ulo? Ingon niini ang pinilosopo nga inistoryahan sa uban nga mahilig mosupak sa mga lagda nga kinahanglan sundon.

Ambot ba kon lisod ba gyud kaayo mamahimong law-abiding citizen alang niadtong gustong misimang.

Hinuon kon dunay mga badlongon mas daghan ang mga tarong apan maangin sa pipila ka mga gahi og ulo.

Niadtong Sabado sa piyesta sa usa ka sitio sa Barangay Basak San Nicolas sa dakbayan sa Sugbo na- overwhelmed ang mga tawo nga nagsaulog pinaagi sa pagsayaw sa Sinulog atbang sa sa kapilya.

Makasabot kita sa tumong unta sa mga participants nga ilang halad nga sayaw ngadto sa patron.

Apan lahi na ang sitwasyon kay naay existing protocol nga gipatuman sanglit niburot man ang kaso sa COVID-19 sa Cebu City.

Ang ilang sayaw maoy nakadapit sa pagdagsa sa mga tawo nga mitan-aw kay seguro gimingaw sa naandan nga kalihokan ug nakalimot nga lahi na ang panahon.

Mag atubang na hinuon sila og kaso tungod sa ilang nahimo nga violation sa quarantine protocol.

Samtang mitubag usab dayon ang piyesta sa A. Lopez sa Baranggay Calamba diin naglingaw lingaw ang mga tawo nga walay mask, nagsikit sikit.

Sila nasayod sa consequence sa ilang gihimo apan gibalewala nila tungod kay gipalabi gyud ang ilang kahigwaos ug katagbawan.

Pastilan subo nga realidad nga magsige og reklamo nga higpit kaayo ang mga otoridad pero sila ra man sad ang nakaingon nga madugay paglingkawas sa COVID-19 kay mosamot man sa paglipang ang kagaw.

Morag hide and seek ang duwa sa mga tawo kon naay mga pulis motago pero inig wala na mogawas ug magpabadlong.

Gamay ra man ang badlongon pero makaamong sa mga nagtinarong.

Busa kadtong mga magpabadlong mao to ang angayan targeton o badlongon sa mga tawong nagtarong.

Kon dili mopatuo aw duklon tabangan og dukol ang ulo aron mahumok, motabang kita sa atong kaugalingon nga makalingkawas na sa giantos nato nga kahadlok ug kabalaka.

Dili bastabasta ang atong kontra busa magtinabangay ta, dili magpabadlong, kon dunay mosimang atong agakon nga mosubay sa katarong.