Purohan batok COVID-19

Nahisama karon sa war zone and dakbayan sa Sugbo tungod sa paghugpa dinhi sa gatusan ka mga pulis gikan sa nagkalainlaing rehiyon sa nasud aron pagpakigbatok sa nagsakang kaso sa coronavirus disease sa siyudad.

Kini human nga gitudlo ni Presidente Rodrigo Duterte si Environment Secretary Roy Cimatu nga maoy modumala sa kampanya batok COVID-19 sa dakbayan nga giingong nahimo nang epicenter sa maong sakit sa nasud.

Nauna niini, gikastigo ni Duterte ang mga lumulupyp sa Sugbo tungod lagi sa pagpabaya sa mga lagda sa krusada batok sa maong sakit. Ug kini kuno maoy hinungdan sa grabe nga pagkuyanap sa maong makamatay nga balatian dinhi.

Aw, bisan unsaon nato og kadismaya sa pamahayag sa presidente, dili gayud nato siya mabasol sa iyang pagtawag kanato og mga suberbiyo. Kita ra usab ang mabasol niini kay nakita man nga mga suwail kita sa lagda sa quarantine protocols. Karon, sa gipakusgan nga aksiyon batok sa COVID-19, gatusan ka pulis ang mihugpa dinhi sa dakbayan in full battle gear nga morag moasdang batok sa mga bandidong Abu Sayyaf. Ug anaa pay pakapin nga helocopter ug mga admored vehicle.

Hinuon atong klarohon nga niining kalamboan, walay martial law nga ipatuman dinhi sa Sugbo kondili ang pagpakusog lamang sa police visibility aron pagkontrol sa kalihokan sa katawhan nga gustong mogawas sa ilang panimalay. Sa ako nang giingon, walay laing mabasol niining atong kahimtang karon kondili kita ra usab. Kay kon nagtiner pa kita og disiplina ug misunod sa mga lagda sa quarantine gikan sa lokal nga pangagamhanan, dili na unta kita moabot sa ingon ini nga sitwasyon.

Ambot kon kanus-a mahuman kining atong seryosong problema sa coronavirus disease. Hinuon, ang kalamposan sa kampanya batok niini, mag-agad ra mismo kanatong mga ordinaryong molupyo. Mao nang walay rason ngano nga dili kita magkahiusa batok niini.