Mga politikong nanglawgaw
Hangtod karon, duha ka semana human gibalik ang Dakbayan sa Sugbo sa enhanced community quarantine (ECQ), nagpabilin ang dakong kang-a tali sa tiyabaw sa mga doktor nga niawas na ang mga pasyente sa COVID-19 sa mga tambalanan ug sa pag-insistir sa mga politiko nga daghan pang bakante sa publiko ug pribadong mga tambalanan.
Maong makapabalaka ang pasiunang mga lakang sa nasudnong gobyerno nga nipasalig nga motabang sa pagbadlong sa paspas nga pagsulbong sa mga kaso sa Sugbo--ang pagpada og dugang mga polis ug retiradong mga heneral ug pagpakatap og mga sakyanang iggugubat.
* * *
Bisan gisalikway sa Inter-Agency Task Force (IATF) ang pasangil nilang Cebu City Mayor Edgar Labella ug Presidential Assistant Mike Dino nga sayop ang pagbalik sa ECQ, nagdungan gyod gani og abot sa Sugbo ang labing dagkong haligi sa IATF ug National Task Force (NTF), sila ra gihapong Dino ug Labella ang gipaminaw.
Ug mao ra gihapoy linya sa duha ka opisyal--ang Dakbayan sa Sugbo ang labing andam sa pandemiya. Bugtong napuno sa ilang panagang maong pagdason sa lusot sa presidente nga gahi og ulo ang mga Sugbuanon.
* * *
Sukwahi sa ilang panghimakak, ug mao ni nakapasamot sa pagduda sa katawhan kay di ganahang gobyerno nga moangkon sa ilang kakuwangan, gihimong mosunod nga mga lakang pagpalambo sa katakos sa mga tambalanan sa Sugbo:
Nipahuwam ang Department of Health (DOH) og nurses ngadto sa pribadong mga tambalanan;
Gitugotan sa DOH ang pagpakatap sa underboard doctors (nigradwar na sa kursong medisina apan wa pa kapasar sa board exam); ug
Mopada ang Armed Forces of the Philippines (AFP) sa ilang mga doktor aron pagtabang sa Sugbo karong semanaha.
* * *
Timaan nga di lang silang Dino ug Labella ang iyang gipakigsultihan, nibutyag si Kalihim Roy Cimatu sa Department of Environment and Natural Resources (DENR) nga pamolitika maoy usa sa mga hinungdan nganong ang Dakbayan sa Sugbo ang may kinadaghanang kaso.
Hinaut nga di lang kutob sa istorya si Cimatu. Hinaut nga gamiton ang tanang gahom nga gisaad sa presidente pagtabang sa mga tambalanan ug pagbadlong sa mga politiko nga nagpahimus (namugos sa rapid test kits) ug nagdugang sa kalibog (namugos sa tuob) sa kampanya batok sa COVID-19.
* * *
- Latest
