Ug nisamot kayagaw ang Sugbo
Napugos sa pagpanira pagbalik ang daghang negosyo nga gitugotan untang maka-operate bisan sa enhanced community quarantine (ECQ) sa Cebu City ug labi na sa general community quarantine (GCQ) sa Cebu Province. Kini tungod sa pagdili na sab sa mga trabahante nga makasud-gawas sa Cebu City sugod sa tungang gabii niadtong Biyernes.
May mga negosyante nga magpadayon unta sa ilang operasyon apan napugos sa paghunong kay nihangyo ang ilang mga trabahante nga mamauli sa ilang mga panimay sa probinsiya. Nabalaka sila nga matanggong og dugay sa dakbayan ug mapasagdan ang ilang mga pamilya.
* * *
Masabtan ang panginahanglan paghigpit sa mga lagda tungod sa pagsulbong sa mga kaso sa COVID-19 sa Sugbo. Apan ang kapakyas sa mga opisyal sa gobyerno pagpasabot sa nag-usab-usab nga mga lagda nisangpot sa lapad nga kalibog ug mas dakong kadaot.
Kay wa may nakaseguro kon ang mga lagda karon mao ba gihapoy lagda ugma, kay nisamot man kalubog ang kampanya batok sa pandemiya sukad niabot ang retiradong mga heneral, gipili sa katawhan ang pagpaabot kanus-a matin-aw ang sitwasyon. Sa kasamtangan, nawagtang ang mga panginabuhi ug mas daghan ang gipanggutom.
* * *
Timaan sa kaguliyang mao ang kalangay sa pagluwat og bag-ong quarantine passes sa Cebu City. Tulo ka adlaw nang way pases ang mga molupyo. Sa ato pa, kon gipatumang lagda nga ang mga may pases ray makapamalit og pagkaon ug tambal, tulo ka adlaw na sang wa kagawas ang mga molupyo sa ilang kabalayan.
Gipasalig sa pamunoan ni Cebu City Mayor Edgar Labella nga maapud-apod nang pases gahapon. Apan nahibaw-an sa mga opisyal sa barangay nga unya pa sa Lunes maandam ang bag-ong mga pases.
* * *
Wa katabang ang pagkabawo sa mga negosyante ug mga trabahante nga nagpanon sa Kapitolyo sa nangaging mga adlaw aron sa pagkuha og pases sa pagsud-gawas sa Cebu City. Nadani sila sa pasalig nga paspas nga atimanon ang ilang mga aplikasyon.
Bitbit ang tanang dokumento sa local government units ug nasudnong mga buhatan sa gobyerno nga nagtugot sa ilang operasyon ubos sa ECQ ug GCQ, nagminghoy kay wa gani pasudla sa Kapitolyo. Gibalibaran sa mga guwardiya nga ang mga may karaang pases sa Kapitolyo ray hatagan og bag-ong pases.
- Latest
