Mag-stay home lang gud ta

Ilabina kitang mga senior citizen, stay home lang gyud ta. Samtang ang coronavirus dili magpili og edad nga takboyan niini, apan, kitang mga senior citizen, gumikan sa kahimtang sa atong panglawas, giisip nga vulnerable og daling katakdan sa sakit.

Maoy atong panghinaut nga wala malakip ang mga senior citizen sa giingon nga mga gahi’g ulo ug walay disiplina. In fairness hinuon sa majority nga mga senior citizen, dili baya kaayo daghang senior ang natakboyan sa sakit. Nagpasabot nga maihap lang tingali sa atong mga tudlo ang mga senior citizen nga nagpabadlong ug nagpabiling gahi og ulo.

Karon gi-istrikto na pag-ayo ang pagpatuman sa mga pandemic protocols, kay, among others, gi-abusahan ang ECQ passes, hinungdan nga daghan kaayo ang migula gikan sa mga pinuy-anan, ug naglakawlakaw sa kadalanan, wala magtaud og face mask ug gipabali-wala ang  physical distancing.

Akong usbon, ilabina kitang mga senior citizen, stay home lang gyud ta. Mag-unsa man sad ka sa gawas? Duna pa kay gikamingawan nga buot nimong igkita gawas sa inyong balay?

Sa atong pagpaminaw sa usa ka ka commentary progam sa radyo, adunay mi-text nangutana kon gi-martial law na ba kita dinhi sa atong dakbayan.

Akong tubag: I dont’t think so. Far from it. Kon buot hunahunaon, ang presence sa kapolisan ug kasundalohan dinhi sa atong dakbayan karon igo lang silang motabang kanatong mga Sugbuanon  aron dili makapatuyang pagpanakod ang coronavirus. So, angayan kitang magpasalamat.

Ug atong nakita nga nag-anam-anam na’g ka-pitol ang kagahi’g ulo sa uban natong kaigsuonang Sugbuanon. Ang focus ni Retired General ug Environment Secretary Roy Cimatu mao ang mga barangay, sumala sa headline sa The Freeman: “As Cimatu’s Cebu assignment kicks off: Baragays in focus.” Ug mao kini karon ang atong nakita tungod kay atua sa mga barangay ang kusog nga pagkaylap sa kagaw. Assignment ni Cimatu: “ Assess the COVID-19 situation and recommend what needs to be done to address it. A known government trouble shooter, Cimatu is expected to hit the ground to the barangay level to gather data and speak with people concerned.”

So, wala sila mo-take over sa pagpamunoan sa dakbayan. Masaligon si Cimatu nga sa pag-cooperate sa mga Sugbuanon, dali rang masulbad kining atong suliran karon, ug dili sila magdugay dinhi sa dakbayan.

Padayon pamahayag ni Cimatu: “Naniniwala ako na with the full cooperation of the people, sandali lang naman ito… like a first aid, stop the bleeding muna… I am really hopeful, I'm optimistic that this will be solved the quickest possible time. “

So, ang gikinahanglan karon, mao ra gyud ang atong kooperasyon ug pagpahumok og gamay sa kagahig ulo sa uban natong kaigsuonan. Dili man tingali ni lisud buhaton ... alang sa kaayohan natong tanan. Lisod ba gud ang pag-stay home, ang paggamit og facemasks, pagpanghunaw, ug paglikay sa pagtapoktapok?

Ug bahin sa gikahadlokan nga hard knockdown, si Sec. Eduardo Año sa DILG,nagkanayon: “I don’t think there is a need for that.”

Padayon sa The Freeman: “Cimatu himself expressed hope there would be no need for the police or the Army for a ‘very forceful’ implementation of quarantine regulations.”