Maikling kasaysayan ng ipinag-panic buying mo
Sa panic buying ng toilet paper noong COVID-19 lockdown alamin natin ang kasaysayan ng produktong ito. Nakakatawa, mula sa Internet.
Ang unang ulat ng paggamit ng t-pap ay sa 6th-century China. No’ng 14th century mina-mass produce na ito ng gobyerno ng China.
Noong 1857 lang nagkaroon ng nakapaketeng t-pap sa America, gawa ni Joseph Gavety. Nakatatak sa bawat sheet ang pangalan niya. Nu’ng 1935 unang nakagawa ng Splinter-Free Toilet Paper – walang salubsob, wala ring aray. Mga Amerikano ang nagdala ng t-pap sa Pilipinas. Bago nu’n iba’t iba ang pamahid: damo, dahon, tangkay ng papaya, dayami, mais, balat ng prutas, patpat, buhangin, bato, o sigay.
Dahil sa global demand, halos 30,000 puno ang nagagamit araw-araw; 19 milyon sa isang taon. Kada rolyo ay mga 333 sheets. Kada punta sa kubeta gumagamit ang mga Amerikano ng 8.6 na piraso. Pitong porsiyento sa kanila ay umaamin na nag-uuwi ng toilet paper ng hotel.
Ang pamahid ng mayayamang ancient Romans ay lana na binabad sa rose water; ang French royalty ay lace. Ang Queen of England ay seda.
Pito sa 10 tao ay di nagti-t-pap dahil mahal o walang kubeta. Ang Europe at Japan mas pabor sa bidet.
Nadudurog ang t-pap dahil maiikli lang ang fibers. Regular na t-pap ang gamit sa International Space Station pero selyado at pitpit sa espesyal na inodoro. Nu’ng Desert Storm t-pap ang pinangkubli ng U.S. Army ng mga tangke. Umuubos ang Pentagon ng 666 rolyo kada araw.
Uso noong dekada-1940 ang de-kolor na t-pap. Tatak Renova ng Portugal, ang pinaka-mahal ngayon, $3 (P160) kada pinabangong rolyo na 3-ply. Pulang Renova ang gamit ni Beyonce; itim ang kay Kris Jenner. Nagpapa-design contest ang Charmin ng pangkasal na gawa sa t-pap; premyo: $2,000. Sumulat si Koji Suzuki (kilala sa horror movie na “The Ring”) ng nobela na inimprenta sa toilet paper. Ang setting ay sa isang banyo, at ang haba ay tatlong metro.
- Latest