Napul-an na ang mga tawo sa COVID-19

Tungod sa nasinati nga tumang kalisod sa katawhan karon murag magmarka bahala nalang basta makakuha og pagkaon alang sa ilang pamilya ug dili na bali balihon ang ilang kahadlok sa coronavirus.

Gani kong basehan nato ang comment sa mga netizens ug mismo sa mga yanong tawo nga akong na-interview, mas nahadlok sila sa kagutom kay sa virus. Kong mahimong isud-an kuno nila ang covid ilang buhaton basta lang maka-survive sa kagutom.

Mangaway pa gani ang mga tawo sa media nganong magsige og report mahitungod sa COVID-19 kay para nila fake news kuno nga naay mga namatay sa virus kay kada mamatay karon ipasangil kuno niini.

Masabtan pud nato sila kay seguro, out of frustation, mao kini ang ilang nabungatan nga pulong kay alang nila mas delikado nga walay ikapakaon sa ilang mga anak.

Dili gyud kaigo ang ayuda kon duna man ngadto sa katawhan kong mahatagan man gani, ginagmay lang nga dili gyud makasustiner kon wala gyud trabaho.

Immune na sila dili sa virus kon dili sa ilang kapakyas nga mahatagan og ayuda. Busa gipakisama nalang seguro nila sa ordinaryong sakit ang COVID-19 kay ang kahadlok nga ilang gibati gipulihan og kahimangod ug kahiubos tungod lagi sa ilang kaapeke, kitang tanan karon apeke gyud.

Bisan kadtong mga adunahan apektado usab pero naa man silay makuot nga kwarta kon naa silay gustong paliton itandi sa mga kabus o bisan kadtong mga naa sa middle class nga mitiyabaw na sa kapait sa panginabuhi.

Ang ingon niini nga scenario delikado kaayo tungod kay dili naman unya makontrol ang pagkatap sa virus nga duna nay gipamatay.

Hangtod nga wala pay tambal, magpabilin kining numero unong hulga sa kinabuhi karon.

Tinuod naay mga nangaayo sa balatian mas daghan kay sa mga namatay pero mao gihapon kay naay namatay nga nagpasabot sa ka delikado kaayo sa maong matang sa sakit.

Ang sakit nga kamatuoran nga puno na ang mga tambalanan bisan kwartahan dili makadali dali og pa-admit, unsa nalang kaha ang mga kabus?

Ang sementeryo gani Mandaue City, matud ni Konsehal Nerry Ruiz, napuno na usab.

Kong ingon niini ang atong madunggan, bation gyud nato ang kahadlok kay mismo ang tagtungod sa mga namatay ang misugilon sa kasinatian sama sa pamilya ni kanhi DOLE Regional Director Elias Cayanong kinsa namatay human nataptan sa COVID-19 ug ang iyang inahan ug duha ka igsuon ang nakalas usab.

Hinuon duna nay daang sakit si Cayanong apan daghan sa atong mga kaigsuonan ang mga huyang ang resistensya nga mamahimo usab nga mabiktima sa kagaw.

Para naka mas okey kon magpabilin ang kahadlok sa mga tawo kay seguradong dili na kini mohimo og mga lakang nga magbutang sa kaugalingon sa kabangis sa virus.

Ang gireklamo sa mga tawo adunay basehan nga angayan tutokan sa gobiyerno. Kay kon ibaliwala kini, mas mograbe ang problema nato sa umaabot.