Igo lang gihapon ang DepEd

Nag-viral ang hulagway sa mga magtutudlo nga nag-tulda daplin sa highway didto sa Maco, Davao de Oro aron lamang makadugtong sa internet, sa ilang pagtambong sa online seminar nga gipahigayon sa DepEd.  Tungod sa maong post, nakaani og pagsaway sa mga netizen ang DepEd.  Tuyo ba sa mga magtutudlo ang pagpukaw sa konsensya sa gobyerno? Hinuon, ilang gitataw nga mapasalamation sila sa DepEd nga nakaapil sa seminar ug nga ang pagpost sa hulagway isip handumanan lamang.  Igo gihapon ang DepEd base sa reaksyon sa netizen.  Paleho ‘la!

Aron dili mahanaw daw bulâ

Isip usa ka paagi sa pagbuhi pagbalik sa industriya sa turismo sa Pilipinas taliwala sa pandemic, gi-proponer sa Toursim Congress of the Philippines ang gitawag nga “bubble tourism” diha sa mga lugar nga gideklarar na nga “safe zones”. Wala ipasabot nga magduwa-duwa ang mga turista og ‘soap bubble game’. Gitumong kini sa pag-promote sa mga tourist spots sa usa ka lugar ngadto sa lokal nga turista.  Ipatuman gihapon ang mga health protocols aron dili mahanaw daw bulâ ang bunga sa maong paningkamot.  Amping gihapon turista!

Lisod balibaran ang humbâ

Adunay dugang siyam ka kaso sa COVID-19 ang natala didto sa Tanauan City, Batangas Province ug sagad sa natakdan gikataho nga natakdan sa dihang mitambong sa gisaulog nga Fiesta didto.  Tingale alang sa maong  mamistahay, dili kabalibaran ang pangamhay sa humbâ, sa kagumkom nga inasal ug sa way puas nga tagay.  Bahal na’g sa COVID  matakdan, basta lang magsinaw ang simod ug mabusdik ang tiyan.  Na hala, atraka na mga baksan!

Swertres result ra mosalig

Segun sa resulta sa survey nga nakutlo gikan sa 2020 Digital News Report, dagha’ng mga Pilipino ang interesado sa balita apan diyotay lang ang misalig niini, labi na kadtong gikan sa social media diin nagdasok usab ang Fake News.  Wala ibutyag kon ang pagka-libakera sa Pinoy mao ba’y hinungdan sa iyang interes sa balita. Wala usab mahisguti nga ang nag-una’ng balita nga gisaligan ra sa Pinoy mao ang resulta sa Swertres ug kon pila na ang natakdan sa COVID.  Interesado sa balita apan dili aron masayod, kon dili, aron duna’y ma-chismis.  Baya no!

Adunay nagpa-diyos-diyos?

Namulong si Mayor Ed Labella nga kinahanglan tumanon ang hukom sa nasudnong kagamhanan pagpaubos sa dakbayan sa Sugbo sa ECQ apan midason siya nga iyang i-apelar ang maong desisyon.  Namulong na daan ang Malacañang nga milapas na ang panahon sa pag-apelar.  Naa diay ni reglementary period? Di ba kahimtang sa lugar ma’y basehan sa pagdeklarar.  Kon mausab na ang kahimtang o kon nasayop ang ilang assessment, angayan nga usbon ang deklarasyon.  Adunay nagpa-diyos-diyos sa Malacañang ni’ng kalakiha. Madahaan!