Nganong mosulat man ka?

Daghan na kaayo ang mga bantugang magsusulat ning atong kalibutan karon. Gani ang uban nila lokal nga mga magsusulat kang kansang kalantip dili pud hitupngan.

Managsama sila og kalibre usab sa ubang mga magsusulat sa laing mga nasud kaniadto, karon ug tingali sa umaabot.

Ang pagsulat kabahin sa natad sa arte apan sa laing bahin mahimong pagaisipon nga kahimanan sa pagpadayag sa atong hunahuna ug pagbati.

Kay lagi ingon ini man gyud ang tumong ug tuyo sa pagsulat. Apan sa laing bahin ang pagsulat nahimong paagi sa paglingawlingaw ug pagbiya sa makadyot sa kalibotan sa reyalidad aron magpuyo sa kalibutan sa pantasya aron sa ingon makalimtan ang problema.

Ning atong kinabuhi karong panahon sa pandemiya mahinungdanon kaayo ang papangita og kahulogan sa tanan natong pagabuhaton. Kini tungod kay ang paghimo sa ingon makatabang man dako uyamot aron mahalikay kita sa dugang pang pagkagusbat. Gusbat na kaayo ang kadaghanan kanato tungod kay daghan sa mga tawo ang nahikawan sa kinabuhi nga normal. Sa dihang kita gihikawan sa ingon nahimong mas miserable ang tanan alang kanato. Pun-an pa sa mga brainwashing nga wala dinhi wala didto aron atong hangpon ang usa ka matang sa pagkinabuhi nga dakong supak sa atong naandan ug namat-an og buot.

Ang kagawasnon diha sa pagsulat dili lamang sa mapadayag diha sa pagkamamugnaon diha sa pagpakaylap sa atong hunahuna. Nagtangag usab kini og responsibilidad nga kinahanglanon kaayo nga atong masabtan sa hustong pagsabot aron sa ingon dunay regularidad ang tanan natong gipangsuwat.

Sa akong bahin nahimong free flow ang tanan. Dunay mga higayon nga himoon na lang inspirasyon ang kalaay sa kinabuhi aron makapadayag kita sa tinud-anay natong gibati ning panahon sa dakong kalisdanan.

Unta dili unta kining himoong sukaranan aron hadlokon ang si bisan kinsa nga motingog kay kun ato kining buhaton unsaon naman lang ang kultura sa yawan-ong pagpakahilom? Nan, magpabilin kining tinuod alang kanila nga mga bata-bataon pa sa ilang mga panahom sa kinabuhi. Bata-bataon tungod kay buot nilang mabuhong sa proteksiyon sa ilang giilang idolo nga sama uban kanila buot motukob, mahimong himoong hanging una ang panapus kay aron sa ingon ang tanan maantigong manginlabot diha sa katilingbanong pamalandong.