Natulog nga GCQ, nakamata nga ECQ na!

Ingon niini ang nahitabo sa dakbayan sa Sugbo diin daghan kaayo ang nakalitan ug wala kapangandam sa pagbutang og balik ubos sa enhanced quarantine o ECQ.

Kong kahinumdoman sa miaging mga adlaw, dunay information kalabot sa isyu sa ECQ sa syudad nga hugtanong gipanghimakak mismo sa city hall nga gihulagway pa gani nga fake news ug gukdon sa balaod kinsa ang nagpaluyo sa pagkatap sa sayop nga kasayoran.

Busa kompyansa kaayo ang mga tawo nga basin magpabilin nga GCQ o ba kaha ma downgrade na sa MGCQ ang Cebu City ilabi na nga gidayeg man kuno sa IATF ang mga lakang sa dakbayan pagpakigbatok sa COVID-19.

Apan dakong baligtad ang nahitabo dihang gipahibawo ang quarantine status sa dapit sa nasud ug bugtong ang dakbayan sa Sugbo ang mibalik sa sinugdanan nga mao ang ECQ.

Alang sa mga naapektohan dako kaayong kadaut sa ilang panginabuhian ang ECQ kay dili naman sila makapadayon sa ilang mga trabaho. Kon makapdayon man dakong sakripisyo ang ilang himoon makaabot lang sa ilang trabahoan sa mga silingang dapit.

Dunay basehan ang mga tawo sa ilang sentimiento kay asa man sila manguha og ipakaon sa ilang pamilya?

Maayo unta kon makasustiner ang kagamhanan sa paghatag og ayuda sa mga tawo, gani daghan pa nga mga dapit karon nga nagtiyabaw kay kuwang gyud ang ilang makaon.

Sa nahitabo karon, seguro ang uban motumbok sa mayor nga wala matarong pag manage ang coronavirus. Pero sa akong bahin dili ang mayor maoy han-okan sa pagbasol kay gihimo niya ang tanan kutob sa iyang mahimo nga unta mapugngan ang pagkuyanap sa virus. Apan usa ra man ang iyang lawas nga mobantay daghang mga tawo nga gahi og uli nga dili motuman sa quarantine protocol.

Ang problema sa uban magsige og yawyaw ug mobasol dayon sa mga namunoan pero basin usa siya sa nagpabadlong hinungdan nga nigara ang COVID-19.

Ang mayor ug ang ubang mga opisyal mao ang naa sa line of defense nga panalipdan kutob sa ilang mahimo ang mga tawo gikan sa kontra pero mag unsa sila kon mismo ang mga tawo nga gidepensahan maoy mobahog sa ilang kaugalingon ngadto sa kontra.

Hinuon dunay pagkuwang seguro ang city government ilabi na sa pagpahibawo sa tinuod nga sitwasyon sa syudad, tingali aron dili makamugna og panic pero gikinahanglan ang transparency karong panahona.

Kining data sa DOH nga maoy gibasehan sa pagbalik sa ECQ nga 100% o puno na ang mga ICU sa tambalanan, 90% usab nga occupied ang mga isolation beds, 76% na sa mga mga barangay sa syudad ang infected diin 13 ang grabeng naigo.

Sa ingon niini nga scenario, grabe gyud ang sitwasyon, syaro dili mahadlok ang mga tawo kon ingon niini ang makita kay sa magsige og ingon nga daghan ang nangaayo. Hinuon tinuod man nga daghan ang recoveries pero gikinananglan hadlokon ang mga tawo aron mopatuo.

Ang pagpanghadlok nga ipasubay sa kamatuoran nga mao ang tinuod nga sitwasyon sa dakbayan.