Di na panahon sa pagpabadlong

Basi kuno sa ulahing rekord sa Department of Health (DepEd), gikonpirma niini nga ang dakbayan sa Sugbo maoy nag-una sa mga lugar nga adunay labing daghang kaso sa coronavirus disease o COVID-19 lukop nasud.

Matud ni Dr. Tony Leachon, ang special adviser ni Secretary Carlito Galvez, ang chief implementor sa action plan batok sa COVID-19, nga gikan sa June 2 hangtod June 11, ang Cebu City kuno ang epicenter sa coronavirus sa nasud.

Tungod niini, daghang molupyo dinhi ang nangahadlok nga basin unya kon mobalik ang siyudad sa Sugbo ngadto sa enhanced community quarantine (ECQ) taliwala niining paspas nga pagsaka sa mga kaso sa COVID-19.

Sa pagkakaron, ania na sa general community quarantine ang siyudad. Apan karong adlawa o sa umaabot nga adlaw, modesider na ang Inter-Agency Task Force for the Management of Emerging Infectious Diseases mahitungod sa status sa dakbayan kon pabilin ba kini sa GCQ o mobalik sa ECQ.

Hinuon, dili angay nato nga kabalak-an kining maong kalamboan. Ang pagsaka sa mga kaso sa coronavirus dinhi sa siyudad nagpasabot lamang nga daghan ang willing ug gusto nga magpa-test sa maong sakit.

Angay pa man gani kita nga magpasalamat nga daghan sa mga molupyo dinhi ang mipailalum sa mga massive testing nga gipahigayon sa lokal nga pangagamhanan ug ubang ahensiya sa gobiyerno. Ug mao na kini karon ang resulta.

Karon nga konpirmado na nga ang dakbayan sa Sugbo maoy nag-una sa mga kaso sa coronavirus sa nasud, angay lamang nga mohimo ang kada usa kanato og dakong lakang sa atong pagpakigbatok niini. Kini sama sa estrikto nga pagtuman sa mga lagda sa kagamhanan.

Kinahanglan nga pakusgan pa ang stay-at-home order sa lokal nga pangagamhanan. Dili na panahon karon sa sige og pabadlong alang niadtong walay mga importante nga tuyo sa gawas. Dili gayud kaya kining maong krusada sa gobiyerno kon walay kooperasyon sa katawhan.