Let us see the scattered!

Bisan pa man sa kabalaka ug kahingawa sa uban, labi na sa mga ginikanan, gibarogan gihapon ni Education Secretary Leonor Briones ang kagustohan sa DepEd nga buksan gayod ang klase karong Agosto 24 kay dili na kini angayan i-oktaba ug magpaabot lang hangtud kanus-a makaplagan ang bakuna batok COVID-19. Tungod ba kaha sa iyang pangedaron ug kasinatian, may pagka-baliroso, may pagka-bukigol ug may pagka-matinumanon na si Kalihim Briones.  Apan ginaingon baya nga “Ang pagka-supakero ug pagka-baliroso mahimong hiyas o birtud kon anaa ka sa hustong baruganan. “Let us see the scattered na lang”!

Dili sama ang pagtratar

Mipadayag sa ilang kasagmuyo ang mga sakop sa nagkadaiyang cause-oriented groups sa giingon’g managlahi nga pagtratar sa kapolisan ngadto sa mga raliyesta nga misupak sa Anti-Terrorism Bill, itandi sa mga miuyon niini.  Dili kita magdahom sa managsama’ng tratamento sa kapolisan ngadto sa mga raliyesta, kay sakop man ang naulahi sa kagamhanan.  Matud pa bitaw ni Tom Robbins, bantugan nga Amerikano’ng magsusulat, “Ang Kaangayan wala magpasabot sa managsama’ng pagtratar sa managlahi nga butang, hinooa, ang Kaangayan anaa sa managlahi nga pagtratar sa managlahi nga butang”.  Aah, mao ba diay!

‘Stay at home’ kay daghan na

Nunot sa nagsaka nga gidaghanon sa mga COVID-19 patients nga nakaaghat usab sa mga hospital pagdugang sa ilang kapasidad sa pagdawat sa maong matang sa mga pasyente,  gisalindot ni Dr. Jaime Bernadas, Regional Director sa DOH-7, ang kabalaka nga adunay daklit nga pagsaka (spike) sa mga kaso sa natakdan.   Bisan sa maong pamahayag, alang sa katawhan pareho ra ang talan-awon: midaghan na ang kaso sa COVID-19 sa atong dakbayan.  Dili na tingale kinahanglan ang mga maanindot nga terminolohiya.  Ang maanindot nga laraw sa pakigbatok ang mahinungdanon.  Stay at Home lageee!

Tanan pildero gitikasan

Mipasidaan si kanhi US Vice President Joe Biden, ug giingon usab nga presumptive nominee sa Pagka-presidente sa pundok sa mga Democrat, nga buhaton gayod ni Presidente Donald Trump ang tanan aron modaug pagbalik sa eleksyon karong Nobyembre, lakip na ang giingon nga “pagkawat sa eleksyon”.  Mora man og gihanigan na daan ni Biden ang iyang kapildihan. Wala gayod diay politiko nga mapilde sa eleksyon, kay ang tanang maparot mangangkon man nga sila biktima sa tikas.  Baya no!

Optimist batok pessimist

Bisan pa man sa pahayag sa PAGASA nga nagsugod na ang panahon sa ting-uwan, mipasidaan gihapon ang MCWD nga ang dili dayon mo-alibyo ang kahimtang sa supply sa tubig nga mahatag sa mga konsumidor.  Naghulagway ang duha ka ahensya og nagkaatbang nga panglantaw: ang Pagasa, madasigon (optimist); ang MCWD madudahon (pessimist). Ginaingon man hinoon nga ang duha pulos adunay gamit sa katilingban: ang madasigon maoy nag-imbento sa eroplano samtang ang madudahon mao usab ang nag-imbento sa parachute.  Patas ra!