Sugyot ni Leachon

Kun ang special adviser sa Inter-Agency Task Force on Emerging Infectious Disease (IATF-EID) nga si Dr. Tony Leachon maoy pangutan-on posibling mabalik sa enhanced community quarantine (ECQ) o ba kaha modified ECQ ang dakbayan sa Sugbo human sa Hunyo 15.

Kini basi sa personal niyang obserbasyon sa sitwasyon sa dakbayan atol sa ilang gihimong inspection sa miaging semana.

Matud ni Leachon maisip nga kritikal ang sitwasyon sa dakbayan tungod sa padayong pagsaka sa mga kaso sa COVID-19.

Usa sa ilang gitan-aw, gawas sa gidaghanon sa mga kaso, duna bay igong luna ang mga tambalanan ug mga kahimanan nga magamit kun magpadayon pa ang pagsaka sa mga kaso sa higayon nga molugak ang kagamhanan gikan sa kasamtangan niini nga quarantine status.

Ang dakbayan sa Sugbo kasamtanga’ng ubos sa general community quarantine (GCQ).

Gikumpirmar ni Leachon ang katahap sa kadaghanan nga wala itug-an sa Department of Health ug sa kagamhanan sa dakbayan ang tinuod nga kahimtang sa atong mga tambalanan.

Si Leachon miingon nga puno gyud ang mga tambalanan sa dakbayan sa Sugbo ug wa nay igong lawak sa ICU ug ventilators pag-accomodate kon magpadayon ang pagsaka sa gidaghanon sa mga pasyente.

Ug husto ang sugyot ni Leachon nga inay limong-limongon ang publiko sa tinuod nga kahimtang, angayang daygan sila sa matuod ug pasaligan nga gihimo sa kagamhanan ang tanan aron kapugngan ang padayong pagkuyanap sa makamatay nga kagaw.

Sugyot ni Leachon nga klarohon sa kagamhanan ang pagpadangat sa mensahe ngadto sa publiko aron malikayan ang dugang kalibog ug kahingawa.

Dili makatabang pagsulbad sa krisis kun atong ulog-ulogan ang atong kaugalingon ug lipat-lipaton ang publiko.

Tukma ang pamahayag ni Leachon nga di kinahanglang sag-uhon sa mga opisyal sa DOH ug sa dakbayan unsay ilang itubag sa mga pangutana sa media.

Ang pagtug-an sa matuod nga kahimtang ug pagpadangat sa mensahe sa labing simple aron masabtan sa tanan ug paghatag ug kasigurohan nga wala sila magpasagad maoy labing epektibong paagi pagpakalma sa kahingawa sa katawhan.

Usa sa ehemplo nga angayang sundon sa dakbayan sa Sugbo mao ang gihimo ni Gobernador Gwen Garcia sa probinsiya.

Matag-adlaw mohatag og report ang gobernador sa kahimtang sa lalawigan ug sa mga gihimo sa iyang administrasyon.

Ug positibo ang nahimong reaksiyon sa publiko niini.