Among-among ug hinaut dili sabotahe

Midagsa sa City Hall niadtong usang adlaw ang mga senior citizens kay mokubra sa second wave kuno sa pagpanghatag sa financial assistance. Nabalaka ug nagkapuliki intawon ang taga-City Hall, ilabi na ang taga-OSCA ug taga-DSWS, pagbundak sa ulan.

Actually, sa atong nasayran, wala man ipahibalo sa City Hall nga ang pagpanghatag adto himoa sa City Hall. Maoy hinungdan nga daku ang ilang katingala pagdasok sa mga senior citizens didto sa City Hall.

Kinsa ang nag-awhag sa mga senior citizens pagpaadto sa City Hall aron pagkobra sa ilang mga hinabang? Alang nako among-among kini sa mga senior citizens nga gidid-an pa unta pagpagawas gikan sa ilang mga panimalay.

Gumikan sa pag-ulan, gipabalhin sila ngadto sa New Cebu Coliseum sa dalan Sanciangko.

Kinsay tinubdan niining maong fake news? Hinaut nga ang tuyo niining maong disinformation dili pag-sabotahe sa admnistrasyon ni Mayor Edgar Labella.

Layo pa man unta ang eleksyon, ambot ngano nga nagsugod na man sila sa mudslinging batok sa incumbent nga pamunoan, inay nga in the meaning, motunol sila sa ilang tabang pagbatok sa makalilisang nga sakit nga coronavirus.

Ang nahitabo, gumikan sa pagtapok, nga gidili pa unta ubos sa general community quarantine (GCQ), wala na mapatuman ang social o physical distancing, ug daghan kanila ang wala magsul-ob sa facemasks.

Matud ni Jeffrey Ocampo, executive director sa OSCA, kasagaran sa maong mga seniors wala sa ilang mga pinuy-anan niadtong unang semana sa house-to-house nga pagpanghatag, didto sa kalungsoran na-stranded pag-declare sa ECQ.

Ug paghatag og kasayon sa mga senior citizens nga gidid-an pa paggawas gikan sa ilang mga panuy-anan, si City Administrator Floro Casas Jr, nagpahibawo nga tugotan na ang authorization gikan sa mga senior citizens ngadto sa labing suod nga kaliwat o kadugo (next of kin) pagkobra sa cash assistance.

Ug niadtong mapakyas gayud pagkobra sa ilang cash assistanc, gumikan sa bisan unsa nga hinungdan gihatagan og napulo (10) ka adlaw pagkobra, “once the GCQ status in Cebu City is lifted,” matud ni Casas.

* * *

Sa atong pagpaminaw sa nagkalainlaing programa sa radyo, ang mga callers mipadayag sa komon nilang sentimento batok sa ilang giingon nga incompetence somewhere paghatag sa gikinahanglang assistance niadtong naapektohan sa pandemic.

Ang komon nilang kahingawa, among others, mao ang kakulang sa mga sakyanan, ug kakulang sa hinabang pagkaon, ug niadtong wala pa mahimutang nga mga na-stranded gikan sa ilang mga pinuy-anan.

Nagpasabot nga ang gobyerno in general, matud nila, dili diay andam pagtubag sa mga dagkong katalagman, sama niining krisis sa pandemic nga ato karong giatubang.

In fairness hinuon sa atong kagamhanan, ato bayang nakita ang ilang mga paninangkamot pag-contain sa virus, apan gumikan sa kamangtas niining maong kagaw nga wala nato masinati sukad- masukad, dili ma-ato’ ang pagtunol sa gikinahanglang  tabang niadtong naapektohan niini.

On the other hand, gikinahanglan gayud ang atong cooperation ug disiplina pagtuman sa mga restrictions ubos niining gipahamtang nga pag-quarantine sa mga molupyo.

Sa akong bahin, stay home lang gyud ko. Naghuwat lang ko kanus-a kahatagan sa financial assistance niadtong unang semana sa pag-house-to-house nga distribution. Matud ni Ocampo, ang ubang senior citizens impatient kaayo.