COVID-19 humuhupa na nga ba sa Pinas?
Kung ibabase sa pahayag ni Presidential Spokesman Harry Roque, tila ang pahiwatig ay humuhupa na ang kaso ng COVID-19 lalo na sa Metro Manila. Ani Roque, naobserbahan ang aniya’y “downward trend” o pagbaba ng bilang ng mga tinatamaan ng sakit.
Paliwanag ng Department of Health, kung lumalabas na mas marami ang naitatalang bilang ng mga dinapuan ng sakit, ito ay bunga ng mas mabilis na testing ngayon na isinasagawa ng pamahalaan na hindi kagaya noong dati na mabagal. Sa totoo lang, malayo pa para magsaya tayo dahil ang trend sa buong mundo ng mga nagkakasakit sa pandemyang ito ay mataas pa rin at nananatiling North America ang nangunguna. Hindi na tayo tutukoy ng estadistika dahil laman na iyan ng balita sa diyaryo, radyo at telebisyon.
Ayon sa Malacañang, sa magandang trend na ipinakikita ng Pilipinas, posibleng paluwagin pa ang umiiral na community quarantine. Subalit, dagdag ni Roque, kailangan pang obserbahan ang sitwasyon bago gumawa ng hakbang upang luwagan o higpitan ang quarantine.
Sa ilalim ng MGCQ, mas pinahihintulutan ang tinatawag na public gatherings at mas maraming industriya ang papayagang mag-operate. Gayunman, may mga alituntunin pa rin na dapat sundin kaugnay nito.
Ang pinakasentro ng pandemya sa Pilipinas ay ang Metro Manila kaya ayon kay Roque, matamang inoobserbahan ang sitwasyon. Kasi, hangga’t hindi naibabalik sa normal na sitwasyon ang kalagayan ng bansa, limitado rin ang usad ng ekonomiya. Ani Roque, sa darating na Hunyo 15, maaaring magkaroon ng reclassification ang status ng quarantine sa Kalakhang Maynila at iyan ay depende sa pagbaba o pagtaas sa bilang ng mga tinatamaan ng COVID-19.
- Latest
