Gikinahanglan ang mas istriktong pagtuman sa mga lagda ug regulasyon

Sa ato nang nahisgutan dinhi, kon luagan na ang higpit nga mga lagda ug regulasyon pagbatok sa coronavirus pandemic, alang nako, gikinahanglan ang mas higpit nga pagpatuman sa mga maong mga rules and regulations pagpakig-away niining mangtas nga kagaw.

Kini tungod kay mas daghan na man ang mga tawo nga mogawas gikan  sa mga panimalay, ingonman mga sakyanan nga maghuot na sa kadalanan. Gumikan niini, lisud na ang pagpatuman sa social o physical distancing ug pagsul-ob og mga facemasks .

Kini taliwala sa pagkagahi nato’g ulo ug kawala natoy disiplina. Hangtud nga nanggawas kining mga komedya nga walay humok nga ulo.

Unsaon man tuod nato pagseguro nga ang mga tawo nga atong masugatan sa kadalanan, ang mga tindera sa mga mall ug ubang katindahanan, mga pasahero nga atong makauban sulod sa mga sakyanang publiko, ug ang atong gika-transact business nga mga empleyado sa mga buhatang publiko ug pribado, —unsaon nato pagseguro nga kini sila mga asymptomatic?

Busa, akong usbon, tungod lagi kay mas daghan na mang mga tawo nga manggawas gikan sa mga panimalay, atong buligan ang atong gobyerno pagpatuman sa gi-impose nga mga rules and regulations pagbatok sa coronavirus pinaagi sa pagpahamtang og self-discipline sa matag-usa kanato.

Di ba ni mahimo nato? Ug atong pahumokon og gamay ang atong mga ulo.

Usahay gud, kitang tawo ang ato rang kaugalingon ang atong gihunahuna. Wala kitay pag-consider sa kahimtang ug pagbati sa ubang tawo.

Dili kita makahunahuna nga ang atong pagtuman sa mga balaud ug mga lagda nga gi-impose sa  kagamhanan, makaayo kini dili lamang sa atong kauglingon, kundili, kaayohan natong tanan.

Subay ug pahiuyon sa atong gihsigutan dinhi, niay nindot kaayong editorial sa The Freeman pinitsahan og Hunyo 1, giulohan: People must learn not to rely on the government all the time.

Nga dili kinahanglan magsalig kita sa tanang higayon sa mga hinabang gikan sa atong kagamhanan.

Matud pa, atong kutluon: “If there is anything that these past two months should have taught us, it is that we should be prepared to look after our own needs and not depend on the government to take care of everything all the time.”

Nga ang atong nakat-unan sa pag-quarantine nato sa niaging duha ka bulan, mao nga dili sa tanang higayon magsalig kita kanunay sa kagamhanan sa tanan natong mga panginahanglan. Kini tungod kay samtang tulobagon sa kagamhanan ang pagtubag sa mga panginahanglan ilabina niadtong nawad-an sa trabaho, ug niadtong nakalitan ug wala makapangapandam sa kalit nga pag-atake sa coronavirus.

Daghan ang nagkinahanglan og salapi, pagkaon, ug ubang mga necessities, apan matud  pa niining editorial: “The government cannot be expected to take care of the needs of everyone and all the time. Its money and resources are finite, and it has other vital functions to perform aside from feeding and supplying people.”

Busa, hinaut nga ang leksyon nga atong nakat-unan gikan sa kalit nga paghugpa sa kagaw nga makapatay, maoy gikinahanglan nga andam kita kanunay pag-atubang sa bisan unsa nga katalagman nga moatake kanato, aron nga dili na kita kanunay magsalig limitadong resources sa kagamhanan.