Ang nahimugsong Simbahan

Mayo 31, 2020: Domingo sa Pentekostes

Mga Pagbasa: Buh. 2;1-11/Sal. 104/1 Cor. 12;3b-7,12-13/Jn. 20;19-23

Ang awit nagkanayon:

Umanhi ka O Espiritu Santo, pun-a sa kalayo sa imong gugma, ang mga kasingkasing sa imong mga alagad, ipadala ang imong espiritu ug mamugna sila ug bag-ohon mo ang dagway sa yuta!”

Karong adlawa sa kasaulogan sa Pentekostes nahimugso ang Simbahan.

Ang Balaang Espiritu nga gisaad ni Jesus ngadto sa iyang mga tinun-an ang sa katapusan niabot na gyud. Nagpuno kini kanila og kinabuhi ingon man gahum ug kusog diha sa kaikag sa pagsangyaw sa Ebanghelyo. Ang pulong Espiritu gikan man sa mga pulong Hebreo nga RUAH ug sa Griyegong pulong PNEUMAH nga dunay emphasis sa gininhawa.

Kini tungod kay ang maong gininhawa mao man ang naghatag og kinabuhi. Ang bisan unsa nga way kinabuhi dili man moginhawa gani ang atong planetang kalibutan matud pa moginhawa man usab. Ning paagiha ang balaang Espiritu diay principle of life sa atong pagka simbahan.

Mahimong atong masinati ang gahum sa Espiritu Santo sulod na sa hataas nga panahon. Siya ang naghatag kanato og kahupayan panahon sa atong kaluya ug kalisdanan.

Siya ang kalayo nga naghatag og kainit sa nabugnaw nga pagtuo sa kadaghanan. Siya ang nagdasig kanato panahon sa atong mga kalibog ug kawalay kapaingnan.

Ning panahon sa coronavirus, mahinungdanon kaayo nga atong sangpiton ang Balaang Espiritu nga mogiya kanato ning panahon sa dakong krisis. Nagkinahanglan kita og igong kadasig. Nagkinahanglan kita og igong panabot.

Nagkinahanglan kita og pagtuo sanglit ning panahona karon inanay nga nahanaw ang pagsalig sa mga yanong lungsoranon kanila nga anaa sa pangatungdanan. Nagkinahanglan kita og paglaum nga bisan pa man ning dakong kalisdanan makita gihapon nato ang dakong bili sa atong kinabuhi taliwala ning krisis nga atong gisagubang karon.

Pag-Ampo

Ginoo hatagi ko sa kahigayonan nga akong masinati ang kainit sa kalayo nga iya sa Espiritu Santo sama sa nasinati sa imong mga tinun-an duha ka libo ka tuig na ang nilabay.

Maghatag unta kini kanako og kusog ug kaisog sa pagsangyaw sa Ebanghelyo. Itugot nga magamit nako ang akong kinabuhi sa pagsangyaw sa imong mensahe sa kaluwasan. Ikaw buhi hangtud sa kahangturan. Amen.