4Gs ning panahon sa Pandemic

Ang 4Gs dunay gitawag nato og kahulogan ug kinahanglanon kaayo nato aron kita mabuhi ug mo survive ning panahon sa dakong pandemic. Kini nagpasabot ning mosunod:

1. Grasya. Ang coronavirus mahimong pagaisipon natong usa ka dakong disgrasya apan wala kini magpasabot og disgrasya nalang gyud hangtud sa hangtud. Kay luyo ning maong kalisud anaa ang dakong kahigayonan nga mamahimo kitang magkasuod ingon nga banay ug mga higala gumikan ning maong kahigayonan.

2. Gratitude. Bisan pa man sa dakong kalisdanan angayan gihapon nga magmapasalamaton bisan pa man sa mga kalisod.

Bisan pa man sa mga hitabo angayan kang magpasalamat tungod kay hangtud karon buhi ka pa sa gihapon.

Angayan kang magpasalamat kay hangtud karon anaa gihapon ka naglakaw ug naglihok. Angay kang magpasalamat kay hangtud karon makahimo ka sa gihapon sa pagtabang kanila nga mas nagkinahanglan pa kay kanimo.

Busa sauloga ang kinabuhi uban ang dakong kamanggihatagon.

3. Good Deeds kun mga maayong buhat. Usahay gumikan sa kahagip-ot dili naman nuon kita maantigong mopaambit ngadto sa uban.

Atong gihimong rason ang atong kakulangan aron kita dili na lang manumbaling.

Atong gihimong rason ang atong kalisud aron kita mamahimong mamintaha ug mobuhat og bisan unsang makadaut kanato ug sa atong isigkaingon.

4. God kun ang Dios. Ang bugtong paagi aron kita mabuhi mao man ang pagsangpit sa Dios adlaw adlaw sa atong kinabuhi.

Dili man tuod tarong ang akong pagkatulog matag gabii apan mapasalamaton gihapon ako sa Dios kay pinaagi niini nakahigayon gihapon ko sa pag-ampo ug pagpasalamat sa Dios gumikan ning mga maayong butang nga akong nasinati gikan sa akong isigkaingon. Mao nga pasalamat lang gyud ko sa gihapon.

Salamat sa gihapon nga bisan pa man sa akong kahuyangan gitugotan gihapon ko nga mohimo og mayo ngadto sa uban. Mao nga salamat sa Dios! Mas dako ug gamhanan ang Krus ni Cristo kaysa virus.