Igong supply sa bugas

Adunay mga kabalaka nga gumikan niining pandemic nga ato karong giatubang, ang mga tinubdan sa atong gi-import nga, magdumili na unya pagbaligya niini nganhi sa atong nasud, kay tingali unya maapektahan usab ang ilang production gumikan sa pagkaylap sa coronavirus.

Wala kitay angayan kabalak-an tungod kay sa paghinabi pinaagi sa telepono nila ni Presidente Digong Duterte ug Vietnamese Prime Minister Nguyen Xuan Phuc, ang duha ka pangulo nagkasabot nga lig-onon sa duha ka nasud ang cooperation batok sa pagbuntog sa coronavirus.

Si Nguyen Xuan mipasalig kang Duterte ang long-term supply sa bugas. Sa ato pa, magpadayon ang supply sa bugas gikan sa Vietnam sulod sa dugay nga panahon. So, kon maghisgot kita’g bugas, wala kitay angay kabalak-an.

Kining headline sa Philippine Star: ”Vietnam and the Philippines have vowed to strengthen cooperation in the fight against the coronavirus disease 2019 (COVID-19) pandemic as well as in the supply of rice.” Nindot.

Si Duterte nagpasalamat niining gipakita ni Nguyen Xuan Phuc nga pagpakabana sa kahimtang sa atong nasud ug mi-garantiya sa walay hunong nga supply sa bugas nganhi sa atong nasud.

“ Vietnam is the Philippines’ top source of rice imports and a vital partner in food security. That ensuring a stable supply is one of the key aspects of Philippines-Vietnam cooperation,” pamahayag ni Duterte.

Ang duha ka leader misaad nga ilang lihukon ang mechanism sa Southeast Asian Nations (ASEAN) aron maseguro ang critical medical ug equipment supplies sa rehiyonal nga paningkamot pagbatok sa coronavirus disease.

Mao kini ang kamahinungdanon sa panagtambayayong ug paghigalaay sa kanasuran. Ug sayud man kita nga dinhi sa Southeast Asia, ang atong relasyon uban sa kasinlinganan natong mga nasud, gi-maintain kini sa Duterte administration.

* * *

Gumikan sa pagluag na sa mga quarantine restrictions sa pipila ka dapit sa kaulohan, gi-resume ang pagtrabaho sa 'Build, Build, Build' projects sa Duterte administration. Pipila niining maong flagship projects nga gilihok na, naglakip sa Harbor Link, North Luzon Expressway - South Luzon Expressway (NLEX-SLEX) Connector;  Cavite-Laguna Expressway, Skyway Stage 3, R1 Bridge Project, Tarlac–Pangasinan–La Union Expressway ug Subic Freeport Expressway.

Ang tulo ka dagkong infrastructure projects mokabat og P148 bilyones, ug molatas og 64.82 ka kilometro. Of course, makahatag kini’g dugang panarbaho ug mapalihok ug makabuhi sa indutriya sa construction didto sa kaulohan. Ug makapaluag sa trapiko sa Metro Manila.

Ang maong mga proyeto, matud sa Department of Public Works and Highways (DPWH), gipahigayon sa mga dapit nga nabutang ubos sa gipaluagan nga general community quarantine (GCQ).

Ang gobyerno mi-issue og detailed safety guidelines on construction works, sama sa pag-require sa mga trabahador sa dili pagpauli ug pag-istar sulod sa ilang mga quarters during the duration of the project. Ug gilimitihan usab ang pagsulod sa taga-gawas, pagbisita sa dapit sa gitrabahoan.

Ug ang mga supervisors gi-require pag-monitor sa mga personnel nga adunay symptoms sa coronavirus, pagseguro nga ang construction sites na-disinfected, pag-implement sa social distancing measures, ug paggamit sa additional personal protective equipment. Si Finance secretary Carlos Dominguez III namahayag nga ang maong mga flagship projects dili i-downgrade tungod kay makapauswag kini sa “bounce back plan” sa nasud.