IATF ang bahala

Tulo ka adlaw nalang mapupos na ang extended enhanced community quarantine (ECQ) nga gipatuman dinhi sa dakbayan sa Sugbo ug Mandaue.

Si Atty. Rey Gealon, tigpamaba ni Mayor Edgardo Labella, miingon nga ang Inter-Agency Task Force on Emerging Infectious Diseases (IATF-EID) maoy mohukom libkason o lugwayan na sad ang pagpatuman niini taliwa sa nagpadayong pagsaka sa mga kaso sa COVID-19 dinhi sa dakbayan.

Apan matud ni Gealon nga wala morekomendar ang dakbayan og laing lugway sa ECQ. Wala sab sila moawhag sa IATF aron kini libkason. Basi sa pamahayag ni Gealon,  gitugyan nalang sa dakbayan ngadto sa IATF ang paghimo sa disisyon.

Buot ba nga ipasabot ni Gealon nga wala pa silay idiya hangtud ron unsay angayang sunod nga buhaton human sa Mayo 31?

Wala pa ba diay mahuman sa mga eksperto sa dakbayan ug sa Department of Health pag-analisar ang resulta sa gihimong rapid mass testing?

Dili ba mao ni hinungdan nganong niinsister gyud ang mga opisyal sa dakbayan nga mohimo og rapid diagnostic test (RDT) aron sila magiyahan sa sunod nilang mga lakang?  Karon maoy tukmang higayon nga ipresentar sa dakbayan ang resulta sa mass testing ug ipagawas ang ilang rekomendasyon basi sa resulta.

Higayon na sab ni sa mga opisyal sa dakbayan nga pamatud-an ngadto sa mga kritiko sa rapid mass testing nga husto ang paggamit sa maong paagi ug nga way basihanan ang mga pagtahap nga gigamit lang ni nga lansis sa ubang mga mapahimuslanong opisyal aron manapi panahon sa krisis.

Sa higayon nga mapakyas ang mga opisyal sa dakbayan pagpakita sa kaugalingon nilang rekomendasyon basi sa resulta sa rapid testing, gihatagan nila og hinagiban ang mga kritiko pagmatuod sa ilang pagtahap nga ang gihimong mass testing gamit ang RDT usa lang gyud ka pasundayag aron tabunan ang pasangil sa anomaliya sa pagpamalit sa test kits.

Unsa may mamahimong hukom sa mga opisyal human sa Mayo 31, hinaut nga gibasi gyud ni sa science ug dili lang sa personal nga kapritso ug interest sa mga tawong gamhanan.