Di pa maayong mag-GCQ uy

Tan-aw nako sa latest statistics sa Coronavirus Disease dinhi sa dakbayan sa Sugbo, mora’g dili pa angayan nga i-downgrade ang Enhanced Community Quarantine (ECQ) ngadto sa General Community Quarantine, kay kon himoon man gani kini, mosaka pag-ayo ang mga kaso sa Covid.

Tinuod nga sa milabay’ng mga adlaw, mora’g makita nato nga nagkamenos ang gidaghanon sa mga napositibo sa COVID-19, apan kaniadtong Martes, sus, makapanlimbawot sa balhibo kay dunay 96 ka bag-ong napositibo sa mananakod nga sakit.

Kon karon nga ECQ pa ang dakbayan sa Sugbo, daghan man gani ang gusto gyud nga mogawas sa ilang kabalayan aron mosuroy, samot na kon ma-downgrade na kini ngadto sa GCQ ug itugot na ang pagsuroy. Ingna ko nga bakakon kon dili mosaka ang COVID-19 cases.

Karon, samtang nagsuwat ko niining maong lindog, diay miabot nga report kanako nga (May 27) dugang 21 ka tawo ang namatud-an nga positibo na usab sa COVID-19. Sigurado ko nga kining maong mga tawo nakapatakod na usab sa uban.

Makasabot ko nga tingali ang ubang opisyal nagtan-aw nga pwerteng dakoa na og gasto sa kagamhanan. Mosamot kadako sa gasto kay ang ubang opisyal tuyoon man gyud nila sa pagpamahal ang mga paliton nila nga mga produkto.

Dili ba maayo nga usa ka buwan, estriktohon gyud nato nga mag-lockdown ang tibuok siyudad. Kon nakaagwanta man gani ko nga wa na magsuroy-suroy sa milabay’ng pipila ka buwan, ayaw ko’g ingna nga kamo dili mo makahimo?

Kon mag-estrikto lang gyud nga anha ra gyud ta sa atong kabalayan, dili mosuroy bisan sa atong kasilinganan, tingali momenos gyud pag-ayo ang mga kaso sa coronavirus. Apan unsaon, gahi kaayo pasabton ang uban. “Kamay na bakal ang kailangan.”

* * *

Nasubo kaayo ko pagkasayod nga ang suod ko nga higala, si Atty. Marie Velle Abella, nga naila sa angga nga “Amay,” namatay kini kaniadtong Martes sa buntag.       

Buotan kaayo kadto si Atty. Amay. Dugay na kaayo mi nga wala magkita. Igo lang ko nga mangumusta niya pinaagi sa messenger, ug kanunay siyang moingon nga “Ok” ra siya.

Gikan siya sa ospital niadtong sayong bahin sa 2019, ug dihang nagkita mi, gihatag niya nako ang iyang electronics gadget nga mosukod sa oxygen sa atong dugo. Wa na kuno niya kinahanglana pa ug magamit kuno kaayo ni nako.

Saludo ko ni Atty. Amay kay usa siya sa mga “Cum Laude” nga gipatrabaho sa City Hall apan bisan pa niini, mahigalaon kaayo siya nga pagka abogada ug bisan na dihang nahimo siya nga opisyal sa City Hall.

Goodbye Atty. Marie Velle!