Bigyang prayoridad ang edukasyon
“Kung walang bakuna walang pasukan.” Iyan ang walang gatol na pahayag ni Presidente Duterte sa harap ng hindi pa masawatang pandemya sa COVID-19. May katuwiran naman ang Pangulo. Hindi dapat isakripisyo ang buhay at kalusugan ng mga batang mag-aral.
Pero paano kung abutin ng maraming taon bago makatuklas ng bakuna? Masasakripisyo naman ang pagkakataong dumunong ng ating mga kabataan. Kailangan ang mga alternatibong paraan tulad ng pagtuturo sa pamamagitan ng internet na ikinukonsidera ngayon. Pero ang problema, hindi lahat ng pamilya ay kayang bumili ng computer at internet.
Humanap pa ng ibang sistema. Karamihan ngayon, mayaman o mahirap ay may TV at DVD player kaya puwedeng maghanda ang Department of Education (DepEd) ng mga lesson sa DVD.
Kung marami pa rin ang walang telebisyon dahil sa kahirapan, gawing virtual classroom ang mga barangay halls o kahit covered courts at doon ilagay ang telebisyon at DVD players at puwedeng magdaos ng klase doon kahit limang estudyante lang para may physical distancing. Kung gusto, laging makakahanap ng paraan.
Importante ang edukasyon dahil iyan ang ugat at puso ng lahat ng kaunlaran sa ekonomiya, sosyal at politikal. Kaya sa palagay ko, bagamat pinag-uukulan ng pansin ang pagbangon ng ekonomiya, dapat ding bigyan ng kaparehong prayoridad ang paghanap ng alternatibo para huwag maudlot ang pag-aaral ng mga kabataan.
- Latest
