Wa mangiyugpos sa COVID-19
Ang kalibotanong panghinaut mao nga sa gatosan ka posibleng mga tambal ug mga bakuna batok sa Covid-19, may pipila nga mapamatud-an nang epektibo karong tuiga aron nga makalingkawas na ang binilyon ka molupyo sa kapin sa 200 ka nasud nga nataptan na sa kagaw.
Apan ang kasaysayan sa nahaunang mga bakuna nagpasidaan nga mahimong maabtan og daghang katuigan ang proseso. Ang labing paspas nga bakuna nahimo sud sa upat ka tuig. Gilauman hinuon nga ang mas bag-ong nga teknolohiya ug ang mas lapad nga pagtinabangay makalaktod sa pagbadlong sa Covid-19.
* * *
Bisan gipaluagan nang mga lagda pag-lisensiya sa mga tambal ug nagbaha nang binilyon ka dolyar aron mas paspas nga makaplagan ang mga panagang batok sa Covid-19, may duha ka limitasyon nga lisod laktawan:
Ang clinical trials kinahanglang maglakip og kaliboan ka pasyente aron pagmatuod sa ka-epektibo sa mga bakuna (nga makahimo natong kublan sa kagaw) ug mga tambal (nga makatabang sa mga nataptan sa kagaw aron nga di mograbe o mamatay); ug
Panid-an ang mga pasyente og pila ka tuig aron pagtino nga way motumaw nga mas grabeng mga komplikasyon.
* * *
Tungod sa kadinalian sa panginahanglan sa pagbadlong sa Covid-19 ang gatosan ka paningkamot pagpangita og mga tambal ug bakuna nagtutok sa nagkalainlaing mga paagi sa pagbadlong sa kagaw:
May gitumong sa pagbabag sa kagaw sa pagtapot sa baga ug ubang mahinungdanong bahin sa lawas;
Kon di man kapugngan ang pagsud sa kagaw, badlungon ang iyang pagsanay sa baga ug ubang mahinungdanong bahin sa lawas; ug
Kon di kapugngan ang pagtapot ug pagsanay, badlungon ang kagaw sa pagguba sa baga ug ubang mahinungdanong bahin sa lawas.
* * *
Bisan sa mga pasalig nga mahibaw-an na may bakuna na ba batok sa Covid-19 karong Hulyo ug kasugdan na paggamit karong Septiyembre, niangkon ang mga eksperto nga imposible ang pagtino kanus-a mapamatud-an ang ka-epektibo sa mga panagang sa Covid-19.
Apan di kapasanginlan ang kalibotan nga nangiyugpos lang. Ang kinadak-an sa gatosan ka clinical trials sa nagkalainlaing kanasuran mao ang Solidarity Trial nga gipasiugdahan sa World Health Organization (WHO): Sa kataposang ihap, gisalmotan sa kapin sa 3,000 ka pasyente sa 320 ka tambalanan sa 17 ka nasud, apil na sa Pilipinas.
- Latest
