Pribiliheyo

Human isira ang ABS-CBN network, miulbo ang masipang opinyon nga gipabuto sa tabiang social media.

May nakauyon sa cease and desist order gikan sa National Telecommunications Commission kay ang prangkisa niini natapos na ug wala pa maaprobahi ang renewal nga hagbay rang giaplayan didto sa Kongreso. Apan aduna poy daghang misupak.

Hinuon, taudtaod nang giklaro ni Palawan 1st District Represantive Franz Alvarez, chairperson sa House Committee on legislative franchise, nga ang pagkuha og prangkisa gikan sa Kongreso, kini usa lamang ka pribiliheyo ug dili usa ka katungod.

Hinungdan, nga ilang subayon ang tanang linya sa mga probisiyon nga nalatid sulod sa prangkisa ug sutaon kon wala bay kalapasan ang ABS-CBN nga nahimo?

Nahinumdom hinuon ko, panahon sa administrasyon ni Pres. Corazon Aquino, diin ang chairman sa PAGCOR, si Ma’am Alicia Reyes pa, nga gipauso ang papanghatag nilag Gold Card ngadto sa mga piniling gitawag og super VIP guests.

Kutob sa mga Gold Card holders morag hari ug rayna ang pribelihiyo. Mahalong pagkaon, bino ug kuwarto sa kinamahalang hotel, gihatag. Basta, kutob sa unsay ilang gusto pinatuyangan. Hinungdan, nga giabuso.

Nalimot sila, nga ang nahuptan nilang card, dili usa ka katungod, kondili, pribilehiyo lamang. Kon makita ug mamatud-an sa management nga kini giabuso, mahimong balibaran sila sa unsay ilang gusto, o ikanselar sa hingpit ilang pribilehiyo.

Sama sa nahitabo sa ABS-CBN karon. Dugay na silang naka-apply para renewal sa ilang prangkisa, pero makahibulong nganong mi-expired na lang ilang kontrata, wala gihapon maaprobahi ang bill nga gipanday alang sa maong tumong didto sa Kongreso. May sipyat kaha ang ABS-CBN sa ilang pagpanibya?

Kahinumdoman, nga puwerting sukoa ni Tatay Digong dihang ang gibayrang political advertisement niadtong 2016 presidential election niyang pagpangampanya, wala ipasundayag sa ABS-CBN.

Usab, si House Speaker Alan Peter Cayetano may kahiubos sa ABS-CBN tungod sa nasinating unfair airtime nga gihatag sa mao gihapong network.

Apan wala kini magtumbok nga maoy hinungdang wala i-renew ang prangkisa sa ABS-CBN. Basig aduna pay laing mas dako?

Basig may samad pang gisamaran ang ABS-CBN nga angayng alimon.

Kay kondili kini maalim, bug-at ang gisulti ni Rep. Franz Alvarez: “Securing a franchise from Congress is not a ‘right’ but a ‘privilege’.