Way kapuslanan ug makadaot
Di sila maoy labing una nga nisulti ini. Apan tungod sa talagsaon nilang kinaadman sa medisina ug sa kadagko sa kahugpongan nga ilang girepresentahan nahimong mas bug-at ang ilang pasidaan: Ang Covid-19 testing ginamit ang rapid test kits gawas nga way kapuslanan makadaot pa gyod sa kampanya batok sa kalibotanong katalagman.
Apil sa labing naigo sa pasidaan mao ang nagpatuo nga mga espesyalista sa Covid-19 nga nagpagamit sa ilang ngan sa gikuwestiyon nga rapid mass testing sa Cebu City, Mandaue City ug Lapulapu City ug sa tanang trabahante sa di pa makabalik sa ilang trabaho.
* * *
Moinsistir ba gihapon ang Sugbuanong mga espesyalista pagpaluyo sa Project Balik Buhay (PBB) bisan sa hinugpong nga pamahayag sa ilang nasudnong kahugpongan nga ni-detalye sa dagkong kadaot nga namugna sa rapid test kits? Supakon ba nilang opisyal nga baruganan ning pito ka higanteng kahugpongan:
- Philippine Medical Association (PMA);
- Philippine College of Physicians (PCP);
- Philippine Society of Microbiology and Infectious Diseases (PSMID);
- Philippine College of Occupational Medicine (PCOM);
- Philippine Society of Public Health Physicians (PSPHP);
- Philippine Society of General Internal Medicine (PSGIM); ug
- Philippine Academy of Family Physicians (PAFP)
* * *
Pipila sa nakaplagan sa mga espesyalista nga nakapugos nila sa pagbarug batok sa nagbaha nga rapid test kits:
- 20% ra ang sensitivity o katakos pagkaplag og antibodies ug 2/3 sa 20% ang false positive;
- Wa pay rapid test kit nga na-validate sa Research Institute for Tropical Medicine (RITM) nga nagkinahanglan og upat ka semana sa di pa mahingpit pagsubli ang kalidad sa mga produkto; ug
- Ang pagdason og PCR test sa false positive sa rapid test kits modugang sa pagkatanggong sa kaliboan ka swab samples sa mga laboratoryo, nga makapasamot sa kalangay pag-ila sa tinuod nga mga masakiton.
* * *
Gihulagway sa mga espesyalista ang dakong kadaot sa false positive sa rapid test kits:
- Ang pasyente wa kinahanglanang matanggong ug mahikawan sa panginabuhi;
- Mausik ang personal protective equipment ug panahon sa health workers nga moatiman sa pasyente nga way Covid-19;
- Mapugos ang health workers paghimo og contact tracing ug busa mosamot kakuwang ang frontliners; ug
– Tungod sa wa kinahanglanang contact tracing ang tanang nakaduol sa pasyente ipaubos sa wa kinahanglanang isolation.
* * *
- Latest
