Ang tiyabaw sa Alaska

Daghan kaayo negatibo nga mga komento mahitungod sa mga nagpuyo sa sitio Alaska sa Mambaling, Cebu City nga gibansagan pa gani nga mga gahi og ulo kay dili motuman sa lockdown protocol.

Naa pa gani nanghimaraut kanila tungod seguro sa kalagot o nakisakay lang sa isyu nga wala gani masayod sa tinuod nga nahitabo sa dapit.

Siguro naay mga tawo nga badlongon gyud nga dili maminaw sa lagda sa atong gobierno pag-handle niining suliran sa coronavirus.

Apan ang sitwasyon sa Alaska walay kalainan sa ubang dapit kansang mga tawo magpalingoglingog lang.

Dili usab siguro angayan nga hukman ang tanan nga taga-Alaska Mambaling kay kon naay mga gahi og uli naa usay mga law-abiding citizens nga naapil sa lockdown.

Taliwala pa man sa giingon sa atong mga opisyal sa dakbayan sa Sugbo nga nagpadala og ayuda sa dapit nga gi total lockdown nga makita usab sa mga social media post, nganong daghan pa man ang nangayo og tabang sa sulod kay kuwang kuno kaayo ang tabang gikan sa kagamhanan?

Dili usa lang ang nagreklamo nga gipadangat mismo sa akong social media portal sa ilang kasinatian.

Gutom ug miserable ang ilang kahimtang ilabi na nga walay makaon busa ang uban maningkamot nga makagawas basin pa makalusot ug makapanginabuhi aron naay ikasuporta sa ilang pamilya.

Sa ingon niini nga sitwasyon mabasol ba nato sila nga magsabasaba aron lang madunggan ang ilang tiyabaw sa kagutom?

Kong ibutang nato ang atong kaugalingon nga na lockdown ug kuwang pud ang atong nadawat nga suporta, seguro pareha ra usab ang atong himoon kay ang issue niini mao naman ang survival.

Maghuwat ka sa wala hangtod mosiga ang mata sa pagpinaabot sa dugang ayuda apan wala gyuy moabot.

Unta mabalikan og tan-aw sa mga opisyal ang Alaska basin tinood ang kalbaryo nga nahiaguman nila.

Gihukman, gipanghimaraot ug gikamenosan sila tungod daghang COVID-19 sa ilang dapit apan gikinahanglan nga ipatigbabaw nato ang atong pagkatawo aron mabati usab nato ang tiyabaw nila nga nagpaninggit sila og tabang dili lang gikan sa virus kondili sa miserable nilang kahimtang.