EDITORYAL - Bag-ong sistema sa edukasyon

Karong hinay-hinay nga gitangtang sa gobiyerno ang quarantine ug pagpatuman sa gitawag og “new normal” sa tanang aspeto sa kinabuhi sa mga Pilipino, dakong pangutana ang mga kausaban nga ipatuman sa Department of Education (DepEd) sa pagbalik na unya sa klase karong Agosto 24.

Ang DepEd miingon nga prayoridad nila ang kaluwasan sa mga tinun-an sa pagsugod sa klase. Mismo si Secretary Leonor Briones miingon nga tan-awon gyud nila og maayo ang risgo nga nagpaabot kun pananglitan ibalik sa normal ang klase. Dakong problema karon ang sitwasyon sa mga public schools. Pila na ka dekadang nag-atubang sa kakuwangon sa mga classrooms ang public schools.

Gani matag tuig adunay gihimong mga pamaagi ang DepEd aron mapahiluna ug makaeskuyla ang mga bata, pobre man adunahan tungod kay responsibilidad kini sa gobiyerno.

 Maong adunay mga morning classes, afternoon classes ug night classes aron magamit og maayo ang mga pasilidad kay nagkadaghan gyud ang mga tinun-an sa public schools.

Bisan aning pagbahin-bahin sa mga oras, dako gihapon ang tsansa nga magkatinakdanay ang mga bata sa coronavirus kun ibalik sa naandan ang sistema tungod kay tag kapin 50 ka bata ang sud sa matag klase.

Daghang pangutana kun unsaon pagpaigo ang kasamtangang mga pasilidad sa DepEd sa nagkadaghang mga estudyante matag tuig nga dili makompromiso ang panglawas sa mga bata ug sa mga magtutudlo.

Laing sagubangonon kining gihisgotang online education unya diin ang mga estudyante magkinahanglan og computer ug internet aron makatambong sa klase. Dili tanang pamilya adunay computer o internet sa balay.

Sayon ra unya ang paghimo og mga palisiya sa DepEd alang sa “new normal” nga sistema sa education. Apan andam na ba kaha ang mga ginikanan, mga magtutudlo, ug ang tanan pagtuman niini? Ang edukasyon sa kabataang Pilipino batakang katungod ug dili isakripisyo tungod lang sa hulga sa COVID-19.

Apan kinahanglan og suporta ang gobiyerno gikan sa tanang sector may labot aning mga kausaban sa sistema sa edukasyon.