Pagtulon-an

Kuhai ninyo ni og pagtulon-an. Naabereya ang akong sakyanan kagahapon kay na-weak ang iyang battery, mao nga nagpa-rescue ko sa akong bata aron nga mag-motor siya ug iya ko nga apason.

Gusto nako nga ipatan-aw kon nag-abli ba ang Battery Repair Shop sa Nivel Hills kay pakargahan nako ang battery sa akong sakyanan.

Sus, kay nakalimot man sa pagsul-ob og helmet sa tanto nga pagdinalidali.

Gipapauli nako aron magkuha og helmet, apan gikan sa balay mideritso ra kini nga miadto sa Battery Repair Shop. Dinhing tungora nga nasugotan sa mga traffic enforcers nga nagpatrolya.

Kay wa man sab diay magsapatos, aw nadakpan ug naisyuhan og Traffic Citation Ticket (TCT) kay nag-drive nga nagsinelas ra. Kay nahibawo na man ang akong bata sa akong batasan, nagpaisyu ra gyud siya.

Pagbalik niya nako, giingnan ko niya nga nadakpan siya kay nag-drive og motor nga nagsinelas ra. Wa gyud ko masuko kay ang traffic enforcer igo lang nagtuman sa balaod.

Wa sab gyud moabot sa akong hunahuna nga manghangyo kay nakasala man. Nganong gisuwat nako ni dinhi karon? Ang tuyo nako mao nga matudloan unta kamo og leksiyon.

* * *

Duna man go’y uban nga kon madakpan sa paglapas sa balaod sa tukmang pagmaneho og sakyanan, matagbaw pagpanawag kay aron magpatabang nga dili maisyuhan o kaha mapasaylo lang.

Sunda ninyo ang gihimo sa akong anak nga nagpaisyu ra gyud ug way kusmod nga gidawat ang iyang traffic citation aron nga bayran ang iyang multahan.

May mga kaila man gud ko nga pagkasayod nila nga gitudlo ko ni Mayor Edgar Labella isip sakop sa Cebu City Traffic Management Board, nanawag dayon kay gusto nga tabangan ug mapasaylo ra sa nahimong kasaypanan ang ilang mga kaila.

Sus, pwerte tawon nako nga pagpakiluoy nga maglisud gyud tawon ko pagtabang kay wa mi itudlo sa maong katungdanan aron nga kon madakpan ang among mga paryente ug kaila, amo ra nga pasayloon.

Pero, ang ang mga driver nga masita sa mga enforcer, wa pugngi sa paghangyo, apan kon dili gyud mopasaylo nila ang traffic enforcer, dili sila angay’ng masuko.

Makasabot gyud ko sa trabaho sa usa ka traffic enforcer kay mga upat ka tuig ko nga nahimong deputized agent sa Land Transportation Office (LTO) ug wa ko’y gipili sa pagpanakop.

Apan gusto lang sab nako nga sundon ko sa mga traffic enforcers nga kon manakop mo, kinahanglang mopakita mo’g maayong pamatasan, pinaagi sa pagpaubos sa tonada sa inyong tingog.

Ang uban gud nga enforcer kusog kaayo nga mopataas sa tingog kay nagtuo nga gamhanan na kaayo sila.